Durante un entrevista, Monique Giel, Verpleegkundige/ Tienermoederconsulente di Wit Gele Kruis a brinda informacion pa loke ta trata e temporada di COVID-19 y con nan ta deal y trata e mamanan hoben.

Giel a menciona cu na e momentonan aki WGK ta trahando cu e mamanan hoben aki. Mirando cu pa via di e medida di shelter in place no por haci e bishita pa nan, WGK ta monitor sigui nan caso y evalua cua ta e caso di algun di nan cu tin e necesidad mas grandi.

Di esaki, el a bisa cu tur di nan tin necesidad, pero algun di nan ta mas vulnerabel, ta evalua esaki a base di e yamadanan cu ta haci. El a sigura cu e ta haci entre 4 pa 5 yamada, pa motibo cu cada un di nan ta dura di un ora pa ora y mey, pa asina nan por conta con nan ta pasando e situacion, kico ta nan problemanan y kico WGK por yuda riba e problema.

Asina mes, Giel a relata cu e situacion aki di COVID-19 tin un banda bon, pero tambe tin un banda malo. E parti cu e mamanan ta experiencia, hopi di nan ta cu nan a haya miedo pa sali pa via di virus, pero otronan no ta compronde e periodo aki pa loke nan ta cay manera un stress, debi cu nan no por sali.

Esaki ta e grupo cu ta vulnerabel, unda cu nan ta haya cu algun di nan por sali y por bay na unda nan kier. Pero na e momentonan aki nan no por haci esey. Den casonan aki, Giel a bisa cu mester splica nan kico ta pasa. Otro di e parti cu mas ta afecta nan ta e parti financiero, ya cu ta trata di muchanan cu despues di scol tin cu bay traha pa asina nan por tin algun cen pa cumpra e lechi cu pamper.

Tambe nan ta haya e situacion na unda muchanan ta bisa cu door cu nan no ta bin na remarca pa bijstand, pa via cu nan ta menor di edad, nan no por traha y ta depende di nan mayornan. Algun mayor aworaki no tin trabou pa via di COVID-19 y e situacion ta bira mas dificil. Esaki ta e parti cu WGK tin cu atende nan den parti financiero y duna apoyo pa nan.

Otro di e topico cu a bin dilanti ta e parti cu hopi hende ta biba den mesun cas, un famia grandi di wela, welo, omo, tanta, etc, loke ta haci cu na e momentonan aki tur di nan ta na cas y pa cosnan chikito ta presenta algun conflicto grandi, cu hopi biaha ta afecta e mama hoben y su yiu.

Di esaki, Giel a menciona cu ta importante pa trece solucionnan hunto como famia y cu e situacion aki tambe a presta pa trece cu e relacion di algun familiarnan a drecha y esey ta algo positivo.

E grupo di mama hoben cu nan ta maneha ta entre 12 pa 19 aña, Giel a comenta cu na e momentonan aki nan ta hayando yamada di muchanan cu ta na estado y cu nan tin cu sigui traha cu nan pa duna e guia y apoyo cu nan mester.