Den temponan inusual, cierto aspecto di campaña ta keda tradicional

Cu fecha di eleccion dia 25 di juni, e dies partido politico cu lo participa den eleccion pa Aruba su parlamento y gobierno nobo no tin tempo pa perde den nan campaña. Esaki a keda obvio a traves di e accionnan di campaña cu por a nota ta tumando luga na diferente caminda.

Partido HTC (Hubentud Treciendo Cambio) a cuminsa cu un accion di parti sticker riba caya. Riba un video, publica riba nan pagina di Facebook, por a mira nan lider di partido, Gilbert Webb, ta parti sticker na autonan riba caminda. Igualmente riba Facebook nan a crea un invitacion pa pueblo presenta na Censo dia 10 di mei proximo pa firma pa asina e partido nobo aki por participa den eleccion.

Igualmente por a nota partido AVP cu accion di pone bandera, durante cual a pasa na varios cas di nan sostenedornan pa pone un bandera di e partido, dunando asina un bista di e sosten cu cual e partido berde ta conta.

Esaki despues di un reunion tenso algun dia atras, durante cual Crisis Team y Cuerpo Policial a informa e partidonan politico riba e restriccionnan cu ta na vigor pa controla e pandemia di SARS-CoV-2, Covid-19, cual tambe ta conta pa eventonan di campaña. Entre otro a prohibi bishita na cas, teniendo na cuenta cu paisnan bisiña, incluyendo Corsou, unda a mira un aumento drastico den casonan di Covid-19 despues di campaña y eleccion.

Partidonan cu no tin representacion den parlamento mester haya al menos 587 firma dia 10 di mei proximo pa sosten pa nan lista di candidato por ta inclui den papeleta di eleccion. Esaki ta conta pa HTC, Accion21, PPA, UPP, Raiz y CURPA. Partido MAS a participa den eleccion na 2017, pero ainda no a dicidi si lo participa den eleccion dia 25 di juni. Fecha limite pa entrega lista di candidato pa eleccion ta dia 7 di mei.
Mientras cu partidonan cu representacion parlamentario actual, esta MEP, AVP, POR y RED no mester firma pa entrega nan lista.

Con e proceso pa entrega di lista lo ta, no ta conoci ainda. No tin un protocol estableci pa loke ta parada y encuentronan pa compaña e candidatonan entrega nan lista. Sinembargo, por enfatisa cu tur medida di Covid ta keda na vigor, sin excepcion pa partidonan politico.