Den prome reaccion di Ministro di deporte Dangui Oduber riba e sentencia den e ‘bodemprocedure’ di Fundacion Lotto pa Deporte, unda hues ta bari mayoria di gobierno su punto di bista for di mesa, Oduber ta tilda hues di sinta riba stoel di minister. Esaki segun un comunicado manda pa minister.
Increibel pero berdad con un hues ta dicta un sentencia di e manera aki. Loke a sosode aki ta cu un huez ta bin sinta riba stoel di minister! E ta un creacion di un precedente tambe cu mañan ningun otro gobierno no por retira un miembro di hunta di supervision sin mas!
Lotto pa Deporte su mal maneho ta comproba, segun minister Oduber. Pa prome nan a kita e director for di trabou. E echo aki caba ta demostra cu no tawata y no tin supervision of control riba e fundacion. Ademas miembronan di hunta di directiva ta cambia e statuto pa nombra nan mes pa bida largo despues di eleccion di aña 2017, acaso hues no ta haya esaki un decision politico. Nos ta papia aki di amigonan personal di Mike Eman, activistanan di AVP cu a secuestra deporte pa nan beneficio propio. A uza fondonan pa biaha, pa cumpra camara di siguridad, a uza credit card di lotto y tin un salario cu ningun otro miembro di ningun otro hunta di supervision tin.
Tur hende por wak e den ki estado e facilidadnan ta. Tur federacion ta sclama pa mas placa y bo tin e cartel aki cu solamente ta perhudica deporte cada dia nan keda. Aki no ta cuestion di persecucion politico si no un cuestion di señala mal maneho y atende cu esaki. “Hues cu su sentencia mas bien ta duna aprobacion na mal maneho, na scondemento di informacion!” Te dia di awe nos no a ricibi cuentanan anual di lotto for di aña 2014!
Un sin fin di abuso y loke ta mas lamentabel ta e hecho cu deporte a wordo destrui pa un cartel y cu aprobacion di hues. Loke ta importante awor ta cu tin claridad y hues a dicidi pa kita tur autoridad di un minister!
Ta obvio cu nos lo apela e sentencia aki y pronto e cambio di ley lo ta na parlamento pa asina bin cu un fundacion nobo cu lo mester bai competi contra Fundacion Lotto pa Deporte. Ta keda na cada ken, no obstante si bo ta MEP, POR, RED, AVP of Raiz pa boycoytt FLPD y demostra cu nos si lo brinda apoyo y sosten na un Lotto cu fondonan ta bay directamente la deporte!
Cada florin pa FLPD ta un cu no ta bay pa deporte sino pa un grupito y gran parti di e placa ta bai Canada. Esaki ta realmente loke nos kier!? E pregunta cardinal cu ta keda ta, ki sentido tin pa tin un statuut di un fundacion, bay notario pasa acta y na momento cu tin un discusion riba un articulo di e statuut, hues no ta tene cuenta cu esaki y no ta aplica loke ta para den statuut!
