Minister di Husticia, sr. Arthur Dowers ta considera importante pa comunidad sa cu e camaranan di siguridad instala den diferente area ta den funcionamento caba, pero e proceso no a termina completamente ainda.
E mandatario ta haya tambe cu e proyecto aki cu ta contribui pa combati delincuencia a dura mucho largo pa nan bin cla. Sinembargo e grupo encarga cu e proyecto aki ta trahando riba dje pa bin cla pronto.
Minister Dowers a señala cu nan a wordo informa cu denter di seis siman pues na final di luna di september venidero of principio di luna di october, nan mester yega na e conclusion di e trabou aki. Kiermen cu tur camara cu a wordo instala den e prome fase ta bay den operacion.
El a bisa cu iniciando e operacion unabes cu e camara ta cuminsa graba nan mester di e grupo live cu ta bay mira si tin un incidente pa dirigi e incidente for di e mesun central di camara. Unabes cu e prome fase di e proyecto aki ta cuminsa opera totalmente, nan ta bay evalua si mester bin cu mas camara di siguridad pa fortalece e sistema.
Tambe e mandatario a referi na e parti di siguridad den e zona turistico mirando e casonan di criminalidad cu a bin tumando luga contra nos bishitantenan y cu ta afecta nos principal sector economico. Minister Dowers a bisa cu riba e trabou preventivo nan a pone mas polis riba caya den e area hotelero.
“Den e area hotelero nos a pone mas polis cu nunca antes na pais Aruba den e area aki”,el a bisa.
