Den seis siman berguensa a somenta

A scoge un evento importante di campaña pa planea e ‘regreso’ di ministro Paul Croes riba escenario publico? Naturalmente a bisa cu tur esaki a tuma luga espontaneamente, pero nos conoce e partido den gobierno demasiado bon pa kere cu algo sa tuma luga pa casualidad. En todo caso, no den e tipo di cos aki. Esaki ta implica tambe cu lider di partido ta pensa cu ya ta ora pa Paul Croes bolbe riba escenario, pa yuda den campaña.

Por ta cu el a kere tambe cu tabata bira tempo pa aumenta presion riba autoridadnan encarga cu e investigacion, manera e ta kere semper cu e por pone presion riba tur hende. Si nan ta kere esey, ta nan bon derecho y sigur mester haci loke ta kere ta bon. Pero si ta spera cu hende drechi ta apoya e tipo di actitud aki ‘a la Gerrit Schotte’, nan por ta mal ekiboca. Nos sa cu pa banda di partido berde, tanto su lidernan como base, continuamente ta argumenta cu ‘tur hende ta inocente te ora haya nan culpabel’. Esey ta berdad, den corte. Pafo di corte tin cierto regla di decencia, di conducta cara a cara cu comunidad, cu e sospechoso mester mantene, anto nos como pueblo ta mantene respet tambe, a pesar di e echonan cu e lo a comete. Pero pa bo sali riba caya despues di seis siman, cu un aire di ‘niun hende no por haci mi nada pasobra mi partido ta duna mi proteccion’, esey ta net dimas pa soporta. Y claro cu den combersacion personal nos ta haya di tende: “Kico bo kier, si ta asina, anto e no por ni sali bay cumpra un pan?”

No, laga su persona sali trankil for di su cas bay cumpra pan; y ora nos topa cu ne (pa casualidad), sea sigur cu e mesun decencia cu nos kier mira di su persona, ta conta pa nos tambe. No mester bras’e, pero cortesia y civilisacion ta exigi un saludo normal. Bida ta exigi di nos na diferente momento cu nos mester mustra e grandesa cu nos tin gana di mira di otro. Cu no mester nunca husga un persona pa loke el a haci na un cierto momento, e delito, pero tambe pa su conducta na otro momento, den otro situacion. Si no ta asina, nunca lo tin reconciliacion, y no tin reintegracion di persona cu a sinta nan castigo, den comunidad. Y ta esey ta e meta di tin un hende preso pa cierto tempo, no pa castigo so, of no? Pero, den e caso aki nos no ta mira e actitud, sikiera di humildad di banda di e ministro. Si te dia di awe bo no a declara ningun momento cu bo ta inocente, pero si bo ta sali afo awor cu un aire festivo, anto comunidad y prensa si mester keda mantene respet pa bo? En todo caso, probablemente ni e ministro, ni su partido a premira e accion y avance cu autoridadnan hudicial a tuma ayera, unda cu despues di simannan di silencio, Ministerio Publico a haci un aresto nobo den e caso, y a anuncia cu mas lo sigui. Tambe nan a laga sa cu pa loke ta e famoso ‘ontheffing’, nan a constata cu den curso di tempo e ministro a firma centenares di e tipo di exoneracion aki. Kico esey ta implica? Pakico nan ta duna e sorto di detaye asina? Nan ta bisa cu esey cu nan ta sigur di nan caso.

E persona deteni awe no ta parce nos un di e exponentenan mayor di e caso, pero ta indicacion cu ta cuminsa ‘bottom up’, te yega cerca e sospechoso principal… Por ta cu tin desaroyo importante den e simannan nos dilanti. Awor, e aceleracion repentino den e caso aki lo tin algo di haci cu e demostracion di poder di e partido berde den fin di siman? Por ta, nos no sa. Tambe nos a tende rumor persistente di cu di banda di gobierno (di ministro di husticia) lo a pone presion riba OM pa seponeer a caso. Nos ta trata esey tambe pa loke e ta: rumor. Nos ta bay pa e echonan, manera nan bira disponibel. Cu e declaracion di Ministerio Publico cu nan a haya centenares di caso di ‘ontheffing’ nan ta indica cu e acusacion final lo contene tambe e delito di set up un organisacion cu e meta di comete delito. Y cu esey e asunto ta mustra bastante mas grave pa e ministro. Paul Croes ta sospechoso di a viola directamente lo mas sagrado cu bo tin como ministro: e propio huramentacion dilanti Gobernador. No ta dos drink el a dal anto cana subi rotonde den marduga… Y cu e ultimo sucesonan aki, a cuminsa un etapa hopi diferente di loke e miembronan di partido entusiasma tabata imagina diasabra nochi. E pregunta ta si ainda e lo tin gana di sigui presenta su mes como e heroe den campaña. En todo caso, e siguiente pasonan den e caso hudicial aki lo defini si pa dia 4 di augustus e ta material pa subi lista ainda…