Ayera den reunion di Comision Central, mayoria di e parlamentarionan presente a vota na fabor di e propuesta presenta pa miembro di fraccion di MEP, pa ex minister y parlamentario di oposicion, Benny Sevinger no bay representa Parlamento di Aruba den reunion di Parlatino na Panama, otro siman.
Lider di fraccion di MEP, Rocco Tjon a declara cu den e reunion di Comision Central nan a bay debati si un parlamentario den e caso aki, Benny Sevinger, kende ta sospechoso di actonan castigabel penalmente, relaciona cu e caso Avestruz, lo por representa Aruba den exterior. Esaki a surgi a base di un peticion, haci pa un miembro di parlamento, Endy Croes. Pero den un reunion di Comision Central e debate a wordo hiba entre – casi – tur parlamentario.
El a splica cu e caso Avestruz tin di haci cu un ‘caso di corupcion durante e gobierno anterior, caminda un ex-mandatario y actual parlamentario ta wordo sospecha di a comete estafa, soborno, labamento di placa y tambe mal uza su funcion y di falsificacion di documento.’
A pesar cu no ta existi un regla legal pa prohibi cu parlamentario Sevinger, kende ta gosa di su investidura parlamentario, por biaha pa Parlatino, mirando cu ainda no tin un condena den e caso. Lider di fraccion di MEP a bisa cu pa nan tuma e decision aki bo no mester un base legal, ya cu si un persona ta biaha pa trabou, e ta un decision di maneho. Esaki ta conta den sector publico y priva, y e no ta diferente pa parlamento, segun Tjon.
“Pa loke ta trata nos organo legislativo, si un miembro di Parlamento kier asisti na un reunion pafo di Aruba, ta e Comision Central por dicidi si e por of no, bay representa pueblo di Aruba cu placa di pueblo,” el a bisa. “Pues e ta un discusion legal y moral. Esaki independiente si nan ta considera si ta bon cu un persona sospecha di e actonan aki por representa nos pais den exterior.”
Parlamentario Tjon a declara cu e decision cu e Comision Central ta tuma riba e biahe di parlamentario Sevinger, no kiermen cu nan ta tumando un decision si e persona aki ta culpabel of no, ya cu hues ta esun cu ta dicta esey. Igualmente nan no ta evita e parlamentario Sevinger di eherce su trabou como representante di pueblo na Aruba. Ya cu no tin ainda un base legal pa kita e parlamentario aki for di su funcion.
Parlamentario Endy Croes a expresa su satisfaccion cu despues cu dialuna ultimo el a haci un declaracion na prensa, a haya atencion hopi rapido. E mes tambe tabata den e vuelo pa Parlatino, pero ora cu el a tuma nota cu su colega di e fraccion di oposicion di AVP, Benny Sevinger ta riba e mesun vuelo aki, el a haya esaki hopi lamentabel. Croes a condena e hecho cu parlamentario Sevinger ta bay representa nos pais, mirando cu e ta sospechoso den un caso di investigacion penal.
Pa medio di un carta dirigi na nan lider di fraccion, Rocco Tjon, pero tambe na presidente di parlamento, Juan Thijsen, el a pidi nan pa atende su preocupacion den un reunion. Y basa riba e reunion aki ayera merdia nan a debati den Comision Central pa bin cu un decision final si parlamento lo cubri e gastonan di parlamentario Sevinger pa bay Parlatino.
“Unabes cu bo ta un sospechoso oficial di cinco cargo contra bo persona, mi no ta kere ta prudente pa bo ta esun cu por representa e pais Aruba aki den exterior,” parlamentario Endy Croes a declara na prensa ayera mainta. P’esey el a bisa cu su fraccion lo a vota contra e biahe aki di Parlamentario Sevinger pa Panama.
