Parlamentario Endy Croes (MEP) a referi un biaha mas riba e decision tuma den reunion di comision central, caminda un gran mayoria a dicidi pa parlamentario, Benny Sevinger (AVP) no bay Parlatino cu placa di e organo legislativo, mientras cu e investigacion como sospechoso di e caso Avestruz ta tumando luga ainda. Ademas di e fraccion di AVP, tambe fraccion di RED no a bay di acuerdo cu e decision aki.
Croes a bisa cu e mayoria a dicidi pa nenga e posibilidad pa Sevinger bay afo representa nos pais den e reunion di Parlatino na Panama. El a splica cu e votacion den comision central ta diferente cu ora tin votacion den reunion publico pa aproba un ley. Den reunion publico, e votacion ta bay pa cada parlamentario presente, caminda nan ta expresa nan derecho di voto.
E legislado a aclaria cu ora e ta referi un ‘mayoria’ no kiermen un ‘mayoria absoluto.’ Logicamente fraccion di oposicion di AVP no a vota na fabor di e decision aki. Pero igualmente fraccion di RED Democratico, representa pa Parlamentario Ricardo Croes, no a bay di acuerdo. Endy Croes ta contento cu un gran mayoria si a bay di acuerdo pa no laga Sevinger biaha na Panama.
“Pa cierto rason, RED tampoco a bay di acuerdo. Pero e mayoria si!…” el a bisa.
Votacion comision central.
Endy Croes a splica cu den un votacion di comision central, ora bo vota, normalmente ta e lider di fraccion so mester t’ey pa vota. El a agrega cu como cu e caso aki ‘ta uno atractivo’, tabatin diferente otro miembronan di fraccion.
Den un comision central, ora cu e lider por ehempel di fraccion di MEP ta vota, e ta conta pa 9 cu ta e cantidad di miembro di nan fraccion. Igualmente ta sosode pa e otro fraccionnan di AVP, POR y RED, cu ta forma e constelacion den Parlamento. Den e caso aki, mirando cu ora lider di fraccion di AVP, Marlon Sneek a vota, esaki a conta pa 9, e voto cu a marca e mayoria tabata esun di e lider di fraccion di POR, Marisol Lopez-Tromp, cu ta conta pa dos.
Endy Croes a bisa cu dialuna siman pasa, e mes a vocifera su disgusto cu un parlamentario sospechoso, Sevinger, kende ta envolvi den e caso Avestruz, a pone su nomber pa bay representa Parlamento Aruba den Parlatino na Panama. A base di esey el a pidi reunion cu a desemboca su mes diabierna tras di merdia, caminda den sala grandi di Parlamento a yama un reunion di comision central.
Na final di e votacion a bay cu mayoria pa no laga Sevinger representa Parlamento afo. “Mas cu claro, no ta oportuno pa manda net e pa representa bo pais,” Endy Croes a bisa. Pues por lo pronto e no por biaha pa representa Parlamento den exterior, te ora cu e caso aki bin cla.
Pa medio di un carta, Sevinger a wordo notifica –segun Parlamentario Endy Croes- cu for di awor padilanti e no lo haya ticket aereo mas paga for di e institucion aki. E suma cu a wordo transferi pa su cuenta pa realisa e biahe na Panama, e tin cu entreg’e bek.
