Dentro di poco comision fiho di salud den parlamento lo reuni cu AZV unda nan lo pidi pa duna un presentacion y pa por contesta un serie di pregunta cu nan tin, parlamentario, Marisol Lopez-Tromp a comenta.
Den nos comunidad tin hopi pregunta di kico si y kico no ta wordo haci y dicon den un caso si y den otro no, pero por ta ta lubida cu e organo di AZV ta mara tambe na ley y tambe ta tuma den consideracion e parti financiero. P’esey mes, segun sra. LopezTromp, parlamento lo reuni cu nan. A reuni cu AZV caba den e prome mita di aña pasa, pero e biaha aki lo bay tin preguntanan mas specifico riba casonan cu ta tuma luga den comunidad y cu pueblo ta sinti cu nan kier mas informacion y claridad riba nan. Den e cuadro aki por mira cu ultimamente tin fundacionnan ta lantando bou iniciativa propio y ta hayando e sosten di comunidad lo cual si mira for di e banda ey ta hopi positivo pasobra e ta demostra cu nos comunidad ta conbibi cu nos hendenan, pero di otro banda por mira tambe cu tin hopi reproche riba e pakico e fondonan no ta bin for di AZV. Sra. Lopez-Tromp siguiendo cu e tema di AZV a indica cu den e programa di POR ta revisa e rol di AZV unda cu na e momentonan aki e ta bay hopi riba e aspecto curativo y no preventivo y ta un parti importante cu tin e atencion den e programanan di gobernacion. Leynan di AZV lo mester bay wordo revisa y awor cu tin un gobierno nobo sigur lo bay atende cu e necesidad aki.
