Ayera mainta a tuma luga e prome conferencia di prensa di partido POR pa e aña aki, cu presencia di minister di Husticia Andin Bikker, Minister di Infrastructura, Desaroyo Teritorial y Medio Ambiente Marisol Lopez Tromp, Alan Howell vice-presidente di Parlamento y e parlamentario nobo Dellanire Maduro.
Andin Bikker a trece dilanti cu ta bay tin diferente reunion den seno di partido pa cu e cambionan reciente.
Partido POR, Bikker a splica cu desde cu nan a cuminsa cune, e union entre su persona cu Otmar Oduber a delinea cu nan tin un liderazgo comparti y esey tabatin segun su palabranan. Den dos aña aki, nan a sondea kico ta e preocupacionnan di pueblo y nan a traha un programa di partido, cu nan a pone den acuerdo di gobernacion y a base di esey, ‘den dos aña di gobierno cosnan grandi a wordo logra pa pais Aruba’.
Di mesun manera, el a anuncia cu hunto cu e coalicion aki, nan lo kier pidi pueblo un otro mandato, pa nan por bay cuatro aña mas pa sigui ehecuta e trabounan cu nan ta bin haci. Di loke ta trata partido, nan a tene un reunion y a dicidi despues di studia statuutnan pa nan por bay den un proceso pa por yega na un Congreso, pa eligi den un par di luna e lider definitivo di nan partido.
Esaki lo bay ta un proceso democratico, manera Bikker a afirma, y mientras tanto su persona y Otmar Oduber lo sigui como lider di partido pa e proximo luna aki. E proceso pa e Congreso aki tambe lo wordo inicia cu diferente reunion di contacto, caminda lo bay bek na pueblo pa scucha e comunidad y asina por optimalisa nan maneho y eligi un lider.
Di su banda, minister Marisol Lopez Tromp a bisa cu den dos aña cu a pasa den partido POR, a gradici su coleganan pa pone nan confiansa den su persona y a su bes pa e lider di partido Otmar Oduber, pa pasa e cartera pa su persona y asina por sigui cu e trabounan cu e a inicia. Ademas el a menciona cu nan a hereda un cartera di infrastructura cu diferente aspecto cu mester di mehoracion.
