Ayera Rino Hermans di Bureau Rampenbestrijding ta informa Bon Dia Aruba cu ya caba 12 Arubiano of esunnan cu tin famia riba nos isla a wordo evacua for di St. Maarten pa bin Aruba. Atardi prome minister Mike Emann y colega minister Mike de Meza a sali bay St. Maarten.

Segun e protocol di evacuacion ta duna prioridad na e hendenan cu tin problema di salud. Pero den proximo 48 ora, sr. Hermans a informa cu nan lo intensiva e proceso di evacuacion di mas hende di St. Maarten pa nos isla. Esaki lo tuma luga den diferente manera. El a pidi tur hende cu tin famia na St. Maarten pa keda pendiente riba e proceso aki.

Diamars atardi prome minister Eman a sali cu un avion chikito, hunto cu un delegacion di Comision di Calamidad. Minister De Meza a bay den un avion di PAWA Airlines, a bay Minister de Meza cu e intencion di hiba comestibel y otro necesidad basico y bin bek cu Arubianonan.

Prome minister Eman a splica prome cu su salida cu un bes na St. Maarten, ta bay confirma miho kico ta e necesidadnan basico cu St. Maarten tin na e momentonan aki. Esaki ta specialmente importante pasobra e comunicacion entre e comisionnan di calamidad di ambos nacion tabata hopi dificil, pero sumamente importante pa e coordinacion di esfuerso.

“Nos lo haci un inventarisacion debido di kico ta e necesidadnan cu tin na St. Maarten y con nos por yuda pueblo di St. Maarten cu asistencia medico manera nos ta haciendo na e momentonan aki, asistencia logistico, asistencia tambe den ordo publico cu cuerpo policial y percura tambe pa crea e comunicacion aereo pa esnan cu kier sali di St. Maarten un rato, paso e experiencia tabata hopi traumatico.”

Comunicacion
Despues siman pasa e comunicacion ta hopi dificil pa haya informacion na Aruba di e situacion di e Arubianonan na St. Maarten. Nan ta hayando hopi yamada, tambe Cruz Cora, di hendenan cu lo desea sa di e paradero y situacion di nan ser keri na St. Maarten. Actualmente Cruz Cora tin un lista largo di hendenan interesa pa sa algo di nan famia na St. Maarten.
Nan ta estableciendo contacto via radio amateur. Nan ta hayando e datonan di e famianan pa busca e contacto na St. Maarten. Roderick Croes ta un radio amateur cu ta dunando un ayudo valioso pa asina crea e brug di comunicacion aki. Mientras cu na Aruba, Luis Oduber ta coordina e operacion di comunicacion cu e radio amateurnan.

Cruz Cora hunto cu Bureau Rampenbestrijding a uni esfuerso pa asina crea un brug di comunicacion pa localisa e paraderonan di e hendenan na St. Maarten cu tin laso di familiaridad cu Aruba.

Recientemente Indra Anthony di Cruz Cora Aruba a laga sa cu nan ta keda den contacto cu e famianan na Aruba y den momento cu nan por haya algun señal di comunicacion riba telefon di satelite, e lo realisa e comunicacion aki.

E ultimo up date ta cu nan ta lantando nan structura di comunicacion, pero esaki lo tuma su tempo ainda. Bureau Rampenbestrijding ta hayando regularmente informacion a base di esfuerso conhunto cu ta wordo haci entre tur partner di reino Hulandes pa atende cu e calamidad na St. Maarten. Sr. Hermans ta bisa cu esunnan interesa pa sa di nan famia na St. Maarten , libremente nan por tuma contact cu Bureau Rampenbestrijding ya sea via telefon 588-0100 of via nan website: www.cmo.aw.