Diamars ultimo, Mediador di Gobierno sr. Anselmo Pontilius a reuni cu representante di e grupo Canades interesa di opera Aura Casino den Barceló Hotel (ex Occidental Hotel).
Mientras cu ayera tardi, sr. Pontilius a reuni tambe cu sindicato FTA cu ta representa e 44 trahado cu a keda sin trabou, despues cu e casino aki a cera su porta luna di december ultimo. Un bentaha grandi ta cu e grupo aki tin su representante na Aruba cu ta facilita e proceso di negociacion.
Reunion cu grupo interesa
Sr. Pontilius a bisa cu encuanto e desaroyo di e negociacion aki tabata su deseo pa e bay hopi mas lihe; pero esey no ta e caso. Na prome luga e grupo cu actualmente ta interesa a informa formalmente cu nan a avansa bastante cu e hotel y cu nan ta dispuesto pa firma un acuerdo.
El a claria cu firma un acuerdo no kiermen cu nan tin un acuerdo completo, ya cu di otro banda tin e trahadonan cu ta pendiente di nan trabou. Den nos ley adapta na 2013-14 ta para cu esun cu ta tuma e operacion di e casino, aunke e ta un compania nobo, e ta mara na cierto leynan pa tuma e trahadonan cu tur nan condicion di trabou.
Mescos cu e grupo anterior, e grupo nobo Canades a expresa cu e casino a bira mas chikito di loke e tabata ta originalmente, ya cu e hotel mes a haci uzo di un gran parti di e sala. Consecuentemente nan a trece dilanti cu nan no por opera cu tur e 44 trahadonan. Sr. Mediador a indica cu nan tin un punto serio eynan ya cu e pregunta ta cu cuanto trahadonan nan kier opera. Pero di otro banda, ki lo bay pasa cu e otro trahadonan cu eventualmente lo bay. E pregunta ta si nan lo yega un acuerdo si of no pa nan bay?
Sr. Pontilius ta indica cu otro punto serio tin di haber cu e salario di lunanan cu e trahadonan no a cobra fei di e dia cu e casino a cera su porta. Un bon noticia ta cu e trahadonan a cobra nan cesantia cu SVb a destina pa nan caba.
Recomendacion
Mediador di Gobierno a recomenda cu e puntonan anterior no mester bira un problema, ya cu e partidonan envolvi por negosha nan, mientras cu e trahadonan ta cuminsa traha.
“Bo ta reconoce cu abo tin un debe y e debe bo por comparti of reparti ariba termino largo”, el a bisa. E no ta haya cu esaki ta un problema, ya cu e grupo cu ta bay opera e casino mester ta pa termino largo. Un contracto di casino mayoria di biaha ta minimo 5 aña pa 10 aña, te hasta 15 aña.
Ayera tardi, Mediador di Gobierno tabatin plania pa sinta cu FTA y su abogado pa trata e puntonan aki. Igualmente e abogadonan tanto di e grupo como di e sindicato tabatin contacto telefonico caba cu otro, pero ainda e situacion no a wordo resolvi.
Sr. Pontilius a bisa na Bon Dia Aruba cu den e proximo oranan nan lo tin reunionnan intensivo pa atende cu e asunto di Aura Casino. E pensamento ta cu despues di a reuni apart cu representante di e grupo nobo Canades y cu FTA, awe nan lo sinta bek cu ambos partido pa pone cla e puntonan cu e partidonan ta di acuerdo cu otro y e puntonan cu partidonan tin diferencia grandi, entre nan: e cantidad di trahadonan, salario retroactivo, condicion di trabou estableci den contracto colectivo (CAO)y ki tempo e operado ta calcula cu e lo drenta den operacion.
Un biaha mas e representante na Aruba di e grupo Canades a inspecciona e condicion actual di e casino, y nan a informa cu nan lo mester di tempo pa renoba e luga, instala ekiponan nobo y reacomoda tur cos ya cu e sala ta diferente pa motibo cu a bira mas chikito.
Diamars ultimo Mediador di Gobierno a bay wak e situacion di e sala di e casino y tin un parti cu antes tabata oficina y cu awor nan ta bay uze como sala pa gamble. “Tur esaki ta trabounan y nos a bisa nan cu ta importante pa envolvi e trahadonan”, asina sr. Pontilius a bisa na Bon Dia Aruba.
