Ayera durante reunion publico , gobierno a informa parlamento riba e decisionnan cu nan ta bin tumando gradualmente pa atende cu e menasa y crisis di e coronavirus/covid-19.

Prome Minister, Evelyn Wever-Croes a referi riba cada un di e medidanan cu gobierno a introduci desde cu Covid-19 a bati na nos porta dia 13 di maart ultimo. Nan ta mas cu 20 medida cu actualmente ta vigente te dia 19 di april, pero el a adverti cu esaki no kiermen cu nan lo elimina e medida riba e fecha aki. Den curso di otro siman nan lo evalua cada un di nan y dicidi cual di nan lo sigui, cual no y cual mas lo bin acerca. El a referi tambe na e cantidad di caso positivo di cual tin un mucha di 6 aña. Y tambe esunnan cu ta interna den hospital ta 10 di cual 3 ta den unidad di cuido intensivo (ICU).

Tambe el a referi cu gobierno a dicidi di aumenta e medidanan aki mirando cu e weekend aki ta uno critico y di hopi riesgo, ya cu nos comunidad ta gusta bay lama den e fin di siman Pasco Grandi. Tambe el a mustra su positivismo cu na final pais Aruba lo sali afo y lo bin na un bon entendimento cu Hulanda. Mañan lo tuma luga e reunion den seno di conseho di minister di Reino, caminda decision lo cay riba e tipo di ayudo cu lo wordo canalisa pa Aruba y otro partner den Reino.

Na inicio di e reunion aki, presidente di Parlamento, Juan ‘Ady’ Thijsen a considera e seccion aki ‘hopi importante.’ Debi cu nan lo trata e tema di e coronavirus y su consecuencianan. “Mi ta kere y mi ta spera cu tur hende posibel por sigui e reunion aki, pasobra e ta bon pa nos tur sa con nos ta para y unda nos ta bay,” el a bisa.

Fitch a downgrade Aruba.
E reunion aki a tuma luga na momento cu e compania di rating Fitch a downgrade Aruba na BB outlook negativo, y nos pais ta perde e investment rate. E rating aki ta pone nos pais den un situacion dificil pa haya credito riba mercado internacional pa atende cu e crisis actual.

Minister di Finansa y Asunto Economico, Xiomara Maduro a indica cu esaki ta debi na e sla cu Covid-19 ta trece pa nos isla. El a bisa cu e compania aki a presenta un panorama di e paisnan cu a resulta afecta substancial debi na e caida di turismo.

“Lamentablemente mi tin cu bisa cu Aruba ta den e prome luga,” el a bisa. E documento di Fitch ta trece dilanti e efectonan di pais Aruba. Y un di dje ta e acceso na fondo di emergencia necesario pa nos pais por atende cu e reto socioeconomico cu e pandemia aki a ocasiona riba nos isla. E siguiente step cu nan mester bin cu ne y cu ainda nos ta stagna den dje, door di insiguridad cu ta reina riba e yudansa cu Aruba por haya di Reino Hulandes. E ayudo aki ta importante pa asina gobierno por haya e fondo necesario pa atende cu e parti esencial di nos pais.

E situacion cu a surgi despues cu e colegio di supervision financiero CAft a manda su conseho pa conseho di minister di Reino ta alimenta e incertidumbre aki. Esaki a ocasiona tambe e reaccion di e tres fraccion (MEP-POR-RED) cu ta sostene e gobierno di coalicion pa medio di un carta manda na Gobernador di Aruba, caminda nan ta mustra nan indignacion pa e posicion di Hulanda di no otorga donacion, sino ayudo den forma di prestamo, sin tene cuenta cu Statuut di Reino.