Pa varios aña caba tin algun edificio den centro di nos ciudad, di cual nunca ta tende nada, no den e ultimo añanan en todo caso, cu den e estado actual sigur no ta contribui na e bunitesa di nos capital.
Un di nan ta den cara di e turistanan crucero, e edificio antiguo di DOW. Mester bisa si cu no ta laga e edificio completamente pa su cuenta, e ta bastante bon pa loke ta verf, pero ta logico cu no por sigui asina pa varios aña mas. Den pasado tabatin plan pa bende e edificio, dunando e posiblemente un destino comercial, pero e plannan ey no a resulta. Banda di e edificio a aparece un strip mall cu un arkitectura aceptabel, y restauracion di e edificio cu su historia lo caba di drecha e parti di boulevard aki.
Otro edificio cu tambe ta totalmente deteriora, pero tin un uso parcial ainda, ta e edificio unda warda di polis di Playa den Wilhelminastraat ta situa. Segun nos ta comprende, e planta abou ta den uso ainda, igualmente e parkeo, y polis tin hopi aña hospeda den un anexo na otro banda di caya. Pregunta ta cu asina e situacion di nos cuerpo uniforma ta bay keda. No solamente cu e situacion den e caya aki no ta ideal como base di operacion p polis, pero ademas otro seccion di e cuerpo necesariamente ta opera di otro base, manera Recherche cu ta den otro edificio na Frankrijkstraat.
No ta straño cu cualkier otro issue ta resulta di biaha den consulta di miembresia di sindicato di polis, pero e situacion di falta di un base di operacion bon, tanto pa loke ta ubicacion como espacio y funcionalidad, no ta haya atencion? Ta parce nos un tema legitimo.
Banda di tur otro asunto cu gobierno mester atende, y cu tin prioridad, ta di spera cu na cierto momento por haci algo cu e dos edificionan aki.
