“Tabata un privilegio pa nos yuda sirbi desayuno na nos enfermeronan”

Diahuebs mainta, hunto cu Minister di Salubridad, señor Dangui Oduber, Prome Minister Evelyn Wever-Croes a bishita Doctor Horacio Oduber Hospital en conexion cu Dia di Enfermeria pa gradici y felicita nos enfermeronan y desea nan animo pa sigui cu e trabou grandi y importante aki.

“Mi ta contento di a saluda e enfermeronan y gradici nan pa e trabou grandi cu nan a haci durante e pandemia y e trabou cu nan a sigui haci despues. Tabata un privilegio pa nos yuda sirbi desayuno na nos enfermeronan cu tabata un treat di hospital”, Prome Minister a expresa.

Durante su bishita na Hospital, Prome Minister a tuma nota di e expresionnan cu a wordo haci mientras cu el a combersa cu bishitante y pashentnan. Tur ta palabranan di elogio pa cu nos enfermeronan, pa e cuido cu hospital ta duna, pa e edificio renoba di Hospital y e servicio cu Hospital ta brinda.

Dia di Enfermeria ta un dia cu como comunidad, nos ta para keto pa reconoce e trabou grandi cu e enfermeronan ta haci na Aruba. Nos enfermeronan ta esnan cu ta cuida di esnan cu mester di cuido sea pa salud of sea cu nan mes no por cuida nan mes. Nos enfermeronan ta haci un trabou increiblemente grandi.

“Durante e pandemia mi ta corda cuanto anochi nos tabata sali pafo, nos tabata bati man pa nan constantemente. Mi mes tabata varios di e anochinan aki den hospital y bo por a weita e gratitud di esnan cu ta sali e ora ey pa gradici nos enfermeronan pa nan trabou”, Prome Minister a duna di conoce.

Mientras cu awor por bisa cu nos a sali di e pandemia, e retonan pa nos enfermeronan no a bira menos. Nan ta traha cu un cantidad limita di persona. Tin gastonan den cuido cu mester a corta. Y ta den e limitacionnan aki, enfermeronan a sigui duna di nan parti cu alma y cuerpo. Nan ta traha bou di hopi precion. Gobierno di Aruba ta purbando di tur manera pa duna bek pa asina tin mas fondo pa por inverti pa asina por expande e cantidad di personal.

“Nos ta enormemente agradecido pa e dedicacion di tur e enfermeronan den e temporada dificil di Covid y despues cu e dificultad no a kita. Manera hopi sector despues di Covid, hopi enfermero tambe e cansancio a domina y pone nan bira malo poniendo asina mas presion riba otronan. Nan ta un grupo di persona asina special, dedica y cu un determinacion asina grandi. Awe nan ta mustra tambe hopi contento y uni. Pabien na tur e enfermeronan y danki di curason pa tur loke boso ta haci. Hopi forsa cu e trabou duro y cu Dios bendiciona cada un di boso”, Prome Minister a expresa.