Partido CURPA a haya e tristo noticia cu sra. Elaine Geerlings co-fundador di partido CURPA a fayece na Suriname. Un persona cu a stima su pais Aruba y e muchanan cu e tabata duna les di ingles na dje na huishoudschool, JFK y EPB. E tabata gusta yuda hende y duna un man. E tabata gusta naturalesa y lama y sigur tabata disfruta di esakinan na Aruba.
Tambe e tabata stima bestia y cu a cu pasa cerca dje na cas sea un pushi, cacho of biahero semper e tabata tin algo di come pa nan. Tambe e tabata gusta core cabay un deporte cu e tabata stima. Dia cu a lanta CURPA sra. Geerlings sin pensa dos biaha a contribui cu e gastonan di notario y a keda insisti cu esaki. E tabata gusta comparti cu hende sin pidi algo back en cambio.
Un persona humilde y semper cla pa yuda. Un persona para firme den e Palabra di Dios. Su si semper tabata un si y su no semper un no. Pe Dios tabata na prome luga. Despues di a baha cu pensioen a dedica su tempo na su mayornan, su dos yiunan y nieta y diariamente a sigui profundisa su mes mas ainda den e Palabra di Dios.
Nos y Aruba a perde un gran persona den Elaine Geerlings y e lo keda semper graba den nos pensamento nan. Cu un dia nos tur lo topa back den e Reino di Dios. Forsa na famia y nos por ta sigur cu Señor lo a bisa Elaine e palabranan cu semper Elaine lo kier a scucha un dia cu ta: “Well done thou good and faithful servant”. Cu Elaine Geerlings sosega na paz cerca Señor.
