Como cada aña, e Dia Mundial di Donante di Sanger ta celebra na rond di mundo e 14 di juni, na Banco di Sanger di Aruba ayera nan a haci un Open Dag y nan a invita tur nan donante y alabes hende cu tin interes di bira donante pa pasa cerca nan y celebra e dia di ayera.

E evento aki ta pa duna un gradicimento pa tur esunnan cu di manera boluntario y sin haya ningun pago, ta duna su sanger como regalo pa salba bida di hopi hende, tambe pa demostra e acceso di sanger ‘sigur’ y promove su funcion pa un salud eficaz, ademas di destaca e compromiso cu e donante tin pa duna sanger henter aña pa logra e suministro suficiente den e comunidad.

Durante e open dag Bon Dia Aruba a tene un entrevista cu Fabian Werleman, coordinador di Banco di Sanger di Aruba y el a splica cu e dia di ayera 14 di juni cu tabata Dia Internacional di Donador di Sanger, el a bisa cu tabata un dia festivo pa nan mira kico e banco di sanger ta haci, como mustra e parti cu ta sigui su tras, e parti ora e banco si sanger ta traha e productonan, e mashinnan, con nan ta warda esey y ora pa prepara y bay hospital of un pashent cu mester dje.

Werleman a informa cu pa un persona lo por bira donante di sanger, nan ta haci varios pregunta di salud, estilo di bida y nan ta check e presion, e sanger y despues di esey nan ta haci un test pa wak si e sanger ta bon pa e persona lo por ta un donante, e hende mester ta bon saludabel.

El a bisa cu ta existi hende cu tin hopi miedo di hangua of e consecuencia cu lo por trece ora nan ta duna su sanger, Werleman a expresa tocante esey cu nan ta un ekipo hopi profesional, nan ta encarga cu e persona no lo haya ningun molestia prome of durante e proceso cu ta dura 10 min aproximadamente, depende di e persona.

Despues cu un persona ta dona su sanger, e sanger ta pasa pa un proceso di separacion di tres parti, e parti di celula cora, e plasma y e plaketa, cada un di nan tin diferente tempo di duracion pa keda bon, e celula cora ta keda 35 dia, e plaketa ta dura 7 dia y e plasma ta dura 2 aña.

Werleman a duna di conoce cu Aruba ta haya e cantidad di 300 saco di sanger pa luna y pa aña nan mester di 3.200 hende pa cumpli cu standard na nivel mundial, pero e cantidad ta yega na 1.600 persona so.

Di mesun manera, Dr. Sulima Geerman cu ta manager di Calidad di e Banco di Sanger di Aruba, a bisa cu Aruba ta conta cu un ekipo specialisa cu ta yama ‘Mirasol’ cu na Hulanda no ta existi ainda, e mashin aki ta yuda pa destrui tur e virus y bacteria cu nan ta haya for di e producto.

Geerman a bisa cu e comunidad di Aruba ta un comunidad chikito cu nan ta conoce hende cu a bay hospital y cu mester di sanger, ora un persona ta duna su sanger otro persona lo haya, “pero nan mester pensa y ripara cu un di un donacion nos por salba e bida di tres hende”, el a sigura.

E beneficio cu e personanan lo por haya ora nan ta duna sanger ta cu: ta yuda stimula e produccion di celulanan di sanger nobo, ta reduci e risico di haya infarto y accidente cardiovascular, ta haci limpi e triglyceride y nivel di hero den e sanger y ta mehora e fluho sanguineo.