“Locual nos ta pidi di comunidad no ta facil, pero no tin otro forma.” Asina prome minister ta expresa riba introduccion di e crisisheffing cu lo hisa recibo pa consumido hunto cu BBO y BAZV pa 6% entrante juli venidero.
Ayera mainta gobierno a anuncia un heffing nobo di 2.5% cu lo keda introduci juli venidero, cobra di mesun manera cu BBO y BAZV pero cu lo keda destina pa paga proyectonan PPP y gastonan di AZV. Esaki despues cu varios ‘fake news’ a circula cu gobierno lo ta hisando BBO te cu 6%. Aunke e resultado di esaki factibel pa consumido ta keda mescos cu cierto medionan a specula, e medida di ‘crisisheffing’ ta keda compaña pa un plan di parti di gobierno pa ‘drecha e mal rumbo Aruba ta bayendo aden’, segun prome minister. Prome minister, Evelyn Wever-Croes (MEP) banda di introduci e crisisheffing entrante prome di juli venidero lo ta tumando stapnan por medio di un plan di urgencia ‘multi-frontal’ cu lo tuma cuenta cu departamentonan di gobierno, companianan estatal y tambe impuesto cu por cobra riba caya. Segun sra. Wever-Croes, gobierno ta na altura cu tin hopi compania, particularmente multinacional cu no ta declara nan ganashinan actualmente y ta manda esaki den exterior. Pero mirando cu leynan actual ta permiti esaki, no por haci mucho te cu logra cambia e leynan cu ta permiti esaki.
T’asina cu gobierno a cuminsa mara faha na nan propio ministerionan, pero consecuentemente lo ta pidiendo departamentonan y institutonan di gobierno, tanto como companianan estatal pa cuminsa haci mescos. Esaki ta den cuadro di e realisacion di parti di gobierno cu e buraconan financiero ta demasiado grandi, pues prome minister a expresa cu ‘ni tur esaki ta suficiente’.
Mientras gobierno ta marando faha, ta indica cu e medida pa hisa efectivamente e porcentahe cu consumido ta haya riba su recibo hunto cu BBO y BAZV no lo ta permanente. Loke gobierno kier haci ta introduci e medida aki te cu por yega na reforma e sistema fiscal na Aruba, pa asina ‘nos kita e peso di esunnan cu brasa smal pa esunnan cu brasa hancho’. Aunke ora yega asina leu pa introduci e sistema fiscal nobo ‘nos lo por elimina e crisisheffing’, pa loke ta trata e pagonan di PPP ‘nos tin cu warda te cu nos caba di paga nan’.
Medidanan popular
Na mesun momento nan ta bay introduci medidanan positivo pa ‘personanan mas vulnerabel den comunidad’ mirando cu e crisisheffing lo afecta e personanan aki specialmente, segun prome minister. E personanan cu tin un entrada di 2400 florin of menos pa luna kende caba tin derecho riba reparatietoeslag lo haya un aumento di esaki. Alabes pensionadonan (kende ta pagando 10.5% di prima na AZV) na momento cu e crisisheffing drenta na vigor riba prome di juli lo paga solamente 6.5%.
Pa negoshinan chikito cu ta gana no mas cu 12 mil florin pa aña, lo kita e exigencia di paga BBO si nan por indica cu nan no ta gana mas cu e suma specifica. Apart di esaki sra. Wever-Croes ta enfatisa cu tin otro proyectonan cu sea a keda implementa of cu ta den proceso pa keda implementa manera e proyecto pa conecta famianan sin conexion di awa of coriente cu un areglo di pago ‘hopi social’. Esaki adicionalmente na e 32 miyon florin cu gobierno a aproba pa e crisis plan ora a confronta e tragedia cu a sacudi comunidad di e dos muchanan cu a perde nan bida.
Cu e plan multi frontal aki gobierno ta spera cu por medio di realismo por yega aki 3 of cuater aña na un presupuesto sin deficit. E aspiracionnan di e gobierno ta cu por medio di esaki ta mustra e instituto financiero CAft cu nan ta serio y comprometi pa drecha situacion financiero di pais Aruba, pa despues ora e periodo di CAft caba Aruba por tin su propio instituto di supervision financiero.
“E decision aki no ta un decision facil. Probablemente pa cualkier politico e ta un di e decisionnan mas dificil cu e tin cu tuma. Pero nos a compromete nos mes pa soluciona e problema financiero na nos pais. Y nos sa cu nos a bisa cu nos ta haci esey sin aumenta e peso di belasting riba pueblo pero nos no tabata sa kico nos lo en contra. Nos tabata sa cu e situacion t’asina malo, pero no asina malo. Nos no tabata conoce tur loke gobierno anterior tabatin scondi pa nos.”
Segun sra. Wever-Croes gobierno ta optimista den e actitud cu CAft tin ante e plannan cu nan a presenta, pasobra segun prome minister den un carta CAft a bisa gobierno cu ‘esaki ta e prome paso significante cu gobierno di Aruba ta tuma’ den direccion di soluciona problemanan. Esaki tabata nan reaccion riba e medidanan cu gobierno a tuma pa cuminsa snoei den aparato gubernamental. “Aunke den consehonan pa gobierno anterior nan a indica cu e presupuesto no ta realistico, e biaha aki nan no a bisa cu e no ta realistico.”
Gobierno ta spera cu por bini claridad y palabracionnan cu Hulanda riba normanan nobo pa supervision financiero di awo padilanti. “Te awo ora nos a haya nos mes cu un presupuesto cu deficit di 276 miyon nos a logra baha esaki na 191 miyon. E meta awo ta pa yega na un deficit menos cu di aña pasa.”
