Siman pasa Corte di Den Haag a dicta cu e tata Shezad Hemani cu a secuestra su yiu muhe Insiya mester paga e mama 10.000 euro pa cada di cu e tin e mucha na India.
Hof a confirma e veredicto di Corte den Prome Instancia di Den Haag di december 2017, cu a husga cu Insiya mester regresa mas pronto posibel pa Hulanda. Segun Hof e tata Shezad Hemani no tabatin mag di bay cu e yiu sin autorisacion di e mama.
Awor Hof ta mara un multa na e veredicto mirando e gravedad di e caso. Insiya a keda saca abruptamente for di su ambiente confiabel segun Hof. Debi na e actitud di e tata a kibra e contacto cu e mama.
E suma por subi te maximo 1 miyon euro. E tata, un empresario miyonario na India mester paga for di momento cu e ricibi e veredicto, cu ta siman pasa. E yiu a keda secuestra cu violencia 29 september 2016 for di cas di su wela na Amsterdam y hiba pa su tata. E tempo ey e tata tabata den un procedura di divorcio largo cu e mama, Nadia Rashid. El a bay cu e yiu India, caminda ainda e ta biba.
Esunnan cu a secuestra e criatura a haya te 4 aña castigo di prizon juli ultimo. OM ta persigui tambe e tata y un primo cu tabata envolvi den e secuestro. India ta nenga di extradita Hemani. Diplomacia ta trahando pa haya e mucha bek, pero te cu awor ni diplomacia ni intervencion di Premier Rutte no a yuda, pasobra segun India, no tin caso di secuestro.
