Raad van State (RvS) a conseha contra e institucion di un seccion apart pa tratamento di conflictonan den Reino Hulandes, bisando fuertemente cu esaki ta ‘sumamente indesea’.
E peticion cu e paisnan Caribense den Reino a haci pa asina institui un organo encarga cu esaki lo trece den peliger Raad van State y henter Reino, segun vicepresidente di RvS Thom de Graaf, adresando minister Kasja Ollongren di Relacionnan di Reino.
Secretario di Estado Raymond Knops, tambe encarga cu Relacionnan di Reino y Asuntonan Interno ta esun cu a pidi pa RvS su conseho, bisando cu e paisnan su peticion pa institui un organo apart bou di RvS, lo ta ‘institucionalmente intensivo’. Aworaki Eerste Kamer a haya e conseho pa rechasa e ley aki pa asina e por bay bek Tweede Kamer pa asina trat’e di nobo. Anteriormente esaki tabata inclui un amienda proponi pa presidente di parlamento Ady Thijsen (MEP).
Raad van State ta haya cu e amienda di Thijsen ta indeseabel. E extra conseheronan di estado cu e paisnan lo bay nombra bou e Seccion Koninkrijksrelaties, lo por haya nan mes den un posicion dificil, segun De Graaf. “Nan lo mester actua manera un mediado di conflicto independiente, pero nan lo haya nan mes exigi pa tene e argumentonan treci pa nan pais den consideracion special. Asina e conflicto ta reemplasa di luga di e Conseho di Minister di Reino pa e Seccion Koninkrijksgeschillen. E lo por ta, segun de Graaf, cu e posicion di RvS lo cay den peliger. Den corto, De Graaf ta haya cu no tin suficiente argumento pa bin cu un seccion nobo encarga cu media conflictonan entre paisnan den Reino. Anteriormente e posibilidad di un Hof Constitucional tabata un opcion.
