Lider di partido Labor, Lodewijk Asscher a bisa cu su partido lo vota contra tanto e plan di impuesto 2020 como e presupuesto di educacion, a menos cu gobierno bin cu mas placa pa combati falta di maestro y baha impuesto pa personanan cu entrada baho.
Asscher a bisa Volkskrant ayera cu e lo uza e debate di presupuesto pa haci un ultimo intento pa haya mas placa, pasobra gobierno tin suficiente placa den su cashi pa resolve e problemanan. “Si bo no tuma e decision pa ataca pobresa y falta di vivienda na un momento den cual bo tin hopi placa, e ora ey esaki no lo pasa ora economia ta contra nos”, e lider di Labor a bisa.
Gobierno mester di sosten di un partido grandi den oposicion pa pasa su plannan a traves di e Eerste Kamer di parlamento, pasobra e no tin mayoria mas den e senado di 75 asiento. Sinembargo, e menasa di Asscher di no vota lo por tin ningun efecto, mirando cu e partido berde di iskierda, GroenLinks a bisa cu no lo blokia e cambionan den impuesto, segun Volkskrant ta comenta. Lider di GroenLinks, Jesse Klaver, a bisa cu e no kier pa e asunto bira un pregunta di anota punto, y cu tin demasiado cosnan bon den e plan di impuesto como pa rechasa esaki.
