Grupo di protesta Kick Out Zwarte Piet (KOZP) a acusa Polis di no protege nan miembronan despues di un weekend den cual a aresta cuatro persona pa kibra un reunion di forma violento.

E grupo a bisa cu ta preparando siguridad priva pa demostracionnan den 12 municipalidad unda Zwarte Piet tradicional – actornan blanco den makeup cu cara preto – ta participando den e parada di yegada di Sinterklaas. “Nos experiencia ta cu Polis y gobierno no ta tuma e menasa contra nos na serio”, Vocero di KOZP, Mitchell Esajas, a bisa. “Ta birando cada bes mas peligroso pa nos.”

Un reunion di activistanan diabierna anochi na Den Haag a keda interumpi pa vigilantenan kende a kibra bentana di e edificio, a ataca esaki cu klapchi, y a vandalisa autonan parkeer pafo.

Polis a aresta cinco persona, un di nan a keda descarta como sospechoso. Un di e sospechosonan ta un mucha homber di 13 aña di edad.

“A sinti comosifuera nos tabata cera paden”, segun Esajas. “Y si nan bin paden, mi tin miedo cu e no lo tabata djis auto cu a keda daña.”

E grupo tambe a entrega un keho di Polis contra e negociante di Den Haag, John van Zweden, kende a post tweet diabierna atardi yamando pa hende presenta na e protesta ‘cu tar, pluma y otro cos pa saca nan di e ciudad’. E magnate di papel di muraya, kende a converti den multi-miyonario a traves di su participacion cu e club di futbol di Wales, Swansea City, a elimina e tweet.

KOZP a describi e mensahenan como ‘inflamatorio’, mientras Van Zweden a bisa NOS: “Mi no ta dunando mas reaccion riba e asunto aki.” Polis a nenga di duna contesta na e comentarionan di KOZP.

Alrededor di 46 municipalidad, incluyendo nuebe di e dies ciudad mas grandi, ta incluyendo Piet cu cara mancha di as den nan parada di Sinterklaas, mientras NTR, cu ta transmiti e show di television Sinterklaasjournaal, a stop di pone Zwarte Piet por completo. E cambio for di Piet tradicional, cual gruponan manera KOZP ta bisa ta un caricatura racista, ta mas tanto concentra den ciudadnan na costa y areanan cercano. Alrededor di un tercio di pueblo Hulandes ta biba den comunidadnan cu ainda ta uza exclusivamente Piet tradicional.

Experto di terorismo, Teun van Dongen, a bisa NRC cu e incidente mas recien ta refleha e radicalisacion di e movemento yama ‘pro-Piet’, mientras gruponan di supremacia blanco, manera Pegida y Hooligan di futbol, a adopta e causa den añanan recien. “Locual nos a mira diabierna ta un movida den direccion di extremismo”, el a bisa. “Ta hopi unico pa tin decenas di hende participa.”

Van Dongen a bisa cu violencia ta birando normalisa den e movemento pro-Piet. “Bo por mir’e no unicamente riba rednan social, pero tambe den politica. Partidonan ta bisando cosnan cu no por distingui di locual gruponan di derecha extremo ta pidiendo.”