Conseho di Minister di Reino a dicidi diabierna pa pospone toma di decision riba un propuesta riba e pago di e prestamo pa aeropuerto Princess Juliana International di St. Maarten.

Minister Hulandes di Asuntonan Interior y Relacion di Reino, Raymond Knops a bisa diabierna despues di e reunion di Conseho di Minister di Reino, cu pospone e toma di decision riba peticion di gobierno di St. Maarten.

Knops a bisa cu no tabata keda na dje pa duna specificacion riba pakico St. Maarten a pidi pa pospone. “Mi por bisa unicamente cu nos a honra e peticion di St. Maarten pa no pone e propuesta riba agenda di reunion di awe. Tabatin un propuesta, pero lo keda posponi pa e proximo reunion”, el a bisa na medionan di comunicacion. Conseho di Minister di Reino ta reuni un bes pa luna.

Contestando kico St. Maarten lo haci mientras tanto pa cu e prestamo, na balor di $20 miyon en total, Knops a bisa cu e no por duna comentario riba esaki pasobra e no tabata den sapato di St. Maarten. El a bisa cu e precondicion pa e prestamo pa aeropuerto ta ‘conoci’.
E condicionnan aki ta inclui nombramento di project team di aeropuerto, nombramento di un Corporate Financial Officer (CFO) di Schiphol Group, screening di miembronan di management di aeropuerto y board, y algun otro asunto relaciona cu corporate-governance.

Prome minister interino di St. Maarten, Silveria Jacobs, a anuncia diaranson cu gobierno a pidi pa pospone un biaha mas e pago di e prestamo cu a duna aeropuerto aña pasa como medida di emergencia pa sigura sosten di likidez. E pago originalmente mester a tuma luga na november 2019. Gobierno di Reino a aproba un extension di dos luna riba pago e tempo ey.

Knops, kende net a yega bek di un bishita di cuatro dia na Aruba, Bonaire y Corsou, tambe a aborda e asunto di e instruccion financiero di juli 2019 pa Corsou. El a confirma cu e conseho di Conseho di Estado di Reino relaciona cu e procedura di apelacion entrega pa gobierno di Corsou a drenta. “Nos a ricibi e conseho. Mi lo tum’e den consideracion y duna un reaccion pronto”, el a bisa, agregando cu esaki lo bay na e proximo Conseho di Minister di Reino pa tuma e decision final sea proximo luna of e luna despues.

Riba ultimo dia di su bishita na e islanan, Knops a duna un conferencia di prensa na Corsou den cual el a aborda locual e ta considera un falta di accion den ehecucion di acuerdo di crecemento di Corsou, sosten di gobierno Hulandes, y e asunto di Girobank. Segun Knops, e no tabata siendo contundente ora el a bisa cu ehecucion di Strategia di Crecemento di prome minister Eugene Ruggenaath tabata bayendo mucho poco poco. “Mi mester por menciona e ‘bottlenecks’ y mi a conclui cu cos ta bayendo mucho poco poco. Demasiado tiki cos a logra den ultimo mita aña.”

El a bisa cu Den Haag a ofrece conseho na gobierno di Corsou pa yuda agilisa e ehecucion di e Strategia di Crecemento, pero Willemstad mester ta habri pa ricibi e asistencia aki. “Esey mester wordo mira como un gesto di kier yuda. Nos mester yuda otro mas cu nunca. Nos mester mantene e velocidad, pasobra tin oportunidad. Tambe nos mester confiansa.”

Knops a bisa cu experticio Hulandes hopi biaha ta ser mira como ‘mete’ den asuntonan, mientras berdad ta cu ambtenaarnan Hulandes en cuestion ta profesionalnan cu por duna conseho util. El a enfatisa cu e toma di decision na final ta den man di gobierno di Corsou, no e ambtenaarnan Hulandes.

Knops tabata hopi critico di e fiasco di Giro Bank, cual a ser atribui na fayo di supervision di Banco Central di Corsou y St. Maarten (CBCS) di e mal maneho na e Giro Bank. “A comete erornan enorme. Esaki ta inaceptabel y iresponsabel, y ta mustra cu bon gobernacion ta un prioridad maximo. E ta involucra placa di hende, pa cual nan a traha duro y mester ta maneha bon.”