Diabierna ultimo personal di Gabinete di Minister Plenipotenciario y di ATA Europa a tene na antesala di Dia di Betico, un ceremonia pa recorda natalicio di Sr. Gilberto Françoise “Betico” Croes (dfm), politico y estadista Arubiano. Minister Plenipotenciario Guillfred Besaril, Director a.i. di Arubahuis mr. Glenn Ling y director di ATA Europa Tirso Tromp a pone un flor na e busto di Betico Croes.

Prome cu e acto aki sr. Besaril a tene un discurso. E mandatario a scoge pa elabora un poco riba e aña 1985 pa ilustra e situacion di Aruba na e momento aki. ‘Por wel cu na e momentonan aki nos ta tuma decisionnan caminda bo ta bisa nan ta duro, pero a lo largo bo ta bay mira cu na 2020, 2021 y sigur 2022 un biento fresco lo supla pa motibo cu durante 2018 y 2019 decisionnan dificil a wordo tuma na bienestar di loke ta e finanzas publico, desaroyo economico y sigur desaroyo social di pais Aruba.’

‘Dicon mi ta bay bek na aña 1985. E tabata un aña hopi transcendental pa Aruba. Tabata e aña cu LAGO a dicidi pa stop cu e refineria despues di mas cu 60 aña. Aruba no tabata conoce den e periodo ey un desaroyo economico manera awe. E industria turistico no tabata mesun desaroya manera cu e ta awor. Pero decisionnan dificil mester a wordo tuma. Y ta na un momento asina bo ta demostra vision y amor pa bo pueblo. Pasobra sr. Betico Croes (dfm) a pone pueblo dilanti di populismo di su mes como politico. Decisionnan dificil cu 5 pa 7 aña despues expertonan den finanzas publico y economico a bisa kico tabata di Aruba si e decisionnan no a wordo tuma na 1985. Pero tambe decisionnan dificil cu a coste un eleccion y muy probablemente tambe su bida. Un bida cu no a mira su gran logro loke tabata Status Aparte,’ asina sr. Besaril a bisa.

E mandatario a sigui bisa cu esaki no solamente ta momentonan den historia di un pais, pero tambe un historia personal di un gran estadista. Besaril: ‘Unda el a pone su mes un banda na bienestar di un pueblo cu semper el a stima. Pasobra tuma decisionnan manera e famoso 8.2 ( extra belasting riba bo salario) no tabata nada facil. Pero el a hacie cu un vision mirando na unda nos finanzas publico ta, drentando un Status Aparte, y unda nos kier bay. Tur esaki tabata un decision unda el a pidi solidaridad. Pues p’esey mi ta para na 1985. P’esey awe ta importante pa corda con grandi sr. Betico Croes tabata como persona y cuanto amor el a duna y ki ehempel el a laga atras pa nos. Ehempel cu nos mester sigui y cu awe nos por mira atras riba un industria turistico mas stapel, otro aspectonan economico mucho mas interesante cu perspectiva hopi mas fuerte. Nos ta mira cu e unico cos cu nos mester haci ta tuma curashi. Esey ta e lesnan cu el a laga y mi ta kere cu awe ta importante pa nos reflexiona riba e lesnan aki,’ segun Minister Plenipotenciario Guillfred Besaril. E ceremonia a keda clausura cu canto di nos himno nacional Aruba Dushi Tera.