“Ohala cu sali gran periodistanan di esaki den futuro”

Diabierna atardi a tuma luga e ultimo Conferencia di Prensa Hubenil di ‘Periodista pa un Dia’ 2023 den sala di conferencia di prensa di Gobierno di Aruba.

Un total di 31 mucha a participa y a siña conoce nos Premier di Aruba, Evelyn Wever-Croes un tiki mas dunando tambe asina pueblo conoce un tiki mas di bida, profesion, estudio, famia, hobby y deseo pa un miho Aruba di nos Prome Minister. Tambe e muchanan a conoce mas di cerca cu e trabou di prensa na Aruba. Otro siman diabierna, e muchanan cu a participa lo bishita TeleAruba pa wak kico tur ta haci riba e tereno di periodismo pa mantene nos pueblo informa y entreteni.

Sandra Croes, e cara contento yen di positivismo cu ta habri cada conferencia di Gobierno di Aruba, a expresa na e muchanan cu pa haci e trabou aki, semper mester tin un smile na bo cara y mas ainda den bo curason. Esaki ta refleha riba e amor cu tin pa haci e trabou. Y e conseho cu Sandra a duna e muchanan ta, pa stima tur loke nan ta haci cu ta bon. Cada trabou cu nan haci cu gusto y amor y yen di positivismo, cu un sonrisa na nan cara y den nan curason, ta un paso mas pa logra nan futuro briyante.

Cada siman un periodista di TeleAruba a presenta y a splica e muchanan mas di e trabou di ta un periodista. E siman aki, señora Siomara Everon tawata nos periodista invita. Siomara no ta un personahe desconoci pa Aruba. E tin un trayectoria hopi amplio den e mundo di prensa. Un hende muhe cu a realisa su ambicion di niñez pa bira un periodista. Cu su 18 aña Siomara a haya e oportunidad di traha na radio lesando noticia. Siomara a traha pa diferente medio di comunicacion na Aruba eherciendo diferente posicion entre otro, coordinador di redaccion, productor y presentado y tawata tin su programa pa hende muhe.

E entrada di Siomara na TeleAruba tawata un logro na 1996, unda cu el a haya e oportunidad di presenta y produci Actualidad, un show periodistico investigativo danki na señor Norman Thijsen cu a wak potencial den dje. Na Aña 2000 Siomara oficialmente ta haya oportunidad di drenta Tele Aruba como news Anchor y news reporter. Y na 2009 Siomara a join Nos Mainta caminda e ta produci y host e show di mainta te awe, 14 aña den aire. Mientras tanto Siomara semper mi a keda studia mientras e ta traha y a logra realisa varios diploma y curso den journalistiek y comunicacion social. Siomara su conseho pa nos muchanan ta pa sigui nan soño, sigui studia y pensa semper cu nunca ta mucho tempran cu cuminsa realisa e trabou di bo soño.

E hobennan Izabella Yung, Evanee Isabella Fuentes, Maerd Farro, Roxanne Rasmijn, Xiany Paesch, Iva Werleman y Luciana Isabella Willems cu hopi alegria y emocion a bishita Prome Minister den su oficina y den sala di Conseho di Minister na unda nan a haya oportunidad pa scucha kico tur ta pasa den e Conseho di Minister y a haya oportunidad tambe pa saca un potret cu Prome Minister.

Despues a sigui e Conferencia di Prensa Live. Prome Minister a contesta tur pregunta cu e muchanan a haci na su persona y pueblo di Aruba por a disfruta esaki tambe Live via TeleAruba y riba pagina di Facebook di Gabinete Wever Croes 2. Prome Minister a expresa na e muchanan cu e ta aprecia hopi mes cada pregunta aunke, Prome Minister a bisa contento, tawata tin algun pregunta ‘moeilijk’ pero cu placer el a contesta tur. E conseho cu Prome Minister a laga pa e muchanan ta pa semper prepara y haci nan pregunta sin miedo, sin importa con critico e preguntanan ta. “Mi ta spera cu boso ta hiba un bon recuerdo di e programa aki y ohala cu sali gran priodistanan di esaki den futuro”, Prome Minister a expresa.

Den nomber di Gobieno di Aruba, Prome Minister a gradici tur esunnan cu a haci ‘Periodista pa un Dia’ posibel y un exito un biaha mas. Danki tambe na TeleAruba y señora Siomara Everon pa su tempo pa splica nos muchanan mas di e trabou pa informa pueblo. Danki na e mayornan pa permiti nan yiunan participa y danki special na nos muchanan cu a participa.