Apesar cu den e epoca cu nos ta biba awendia tin mayor divulgacion di leynan y tratadonan internacional contra e violencia di genero, tin un aumento di e tipo di delito aki.

Esaki ta debi cu awor e hendenan ta tribi di denuncia e tipo di abuso aki. Pero ainda tin paisnan cu no tin un cuadro legal bon hinca den otro pa castiga debidamente e delito aki, specialmente esun di abuso sexual.

Segun psicologo y sexologo, Maria Lucia Pedra-Fernandes, un cuadro legal bon defini ta fundamental, te hasta e ta preveni cu e tipo di abuso aki por sosode. Pero tambe e ta un instrumento pa sanciona ora un delito di e indole aki ta sosode. Si no ta existi instrumento legal pa castiga debidamente un pedofil, e lo keda depende unicamente di e principionan y balornan di e huesnan cu ta administra husticia.

Un caso di delito di abuso sexual ta demanda un enfoke diferente na otro delitonan. Por ehempel, e ta haya cu e profesional medico cu ta evalua un caso di abuso sexual mester tin e facultad pa tuma contact cu polis of ministerio publico (OM) pa denuncia casonan asina. Di e forma aki nan lo por activa e mecanismo di proteccion di e victima.

E ta haya cu mester duna proteccion di biaha na e victima, ya cu si e no ta haya e proteccion aki, ora cu e ta bay bek den su ambiente di famia, e por hala atras debi na presionnan di e nucleo di famia cerca dje. Tin biaha casonan di abuso di menor ta relaciona cu famia disfuncional. Un caso clasico tin di haber cu padrastro cu ta abusa di e yiu di su pareha divorcia y sin trabou. E persona aki ta cuminsa presiona su pareha ya sea fisica, mental y financieramente pa su yiu abusa por cambia e version di locual a sosode. Of simplemente pa nan hala atras cualkier denuncia of acusacion.

E situacion por bira pio si e mama di e mucha abusa tin un yiu cu e padrastro di dje. Pasobra e mucha abusa ta bay sinti su mes culpabel y responsabel cu su burdugu kende ta tata di su medio ruman, ta bay cera.

Mecanismo legal

Ta importante cu nos ley por brinda e proteccion na e victima di abuso sexual y cu e abusado por paga penalmente pa su crimen. P’esey mester bin cu mecanismo legal ora cu un echo di abuso sexual ta wordo descubri. Un di nan tin di haber cu e prome version duna pa e victima ta esun cu mester wordo poni bou custodia.

E autoridad competente mester graba e version aki y apropia su mes di tur e pruebanan forensico, entre nan esun medico-forensico y evaluacion psicologico, etc… Unabes cu esaki ta sosode, e victima no mag di declara riba e prome version duna, pasobra ya e version aki a keda registra y bou custodia. Kier men no mester duna espacio na e ‘retractacion’, esta cu e victima no por hala atras su version inicial. Tampoco mester duna espacio na e ‘re victimalizacion’; kier men cu e victima ta cambia su prome version, pasobra e ta sinti su mes culpabel pasobra esun cu a abusa di dje tin un relacion familiar of di amistad cu su famia. Mester evita cu e pedofil por keda liber y sigui comete e tipo di acto criminal aki.

Pedra-Fernandes ta un profesional cu ta conoce di fondo e tipo di problema aki. Pa basta aña el a traha cu e tribunalnan penal di violencia contra hende muhe na Venezuela. Durante 12 aña e tabata e psicologo lider di e ekipo encarga di evalua y traha e rapport psicologico, tanto di e victimanan y tambe esun acusa di abuso sexual, of cualkier tipo di abuso denter di e loke a wordo defini penalmente como violencia di genero, manera violencia psicologico, fisico y sexual cu ta esun cu tin mas consecuencia.

Pronto e profesional experto aki lo duna un charla tocante e ‘ciclo y tipo di violencia’ cu lo tuma luga dia 24 di mei venidero den oranan di atardi den e localidad di Belle Pensee na Wayaka Falls Mall.