Ora e promer ola di coronavirus a dal nos, por bisa cu nos a actua adecuadamente. A cera e pais, aceptando tur e consecuencianan di e situacion cu esey a crea. Miles di cupo di trabao perdi, otro miles mas na peligro. A tuma medida pa contraresta tur esaki, apoyando tanto empleado cu subsidio di salario,y de paso naturalmente nan empleador, cu lo por a cera porta varios luna pasa si no ta pa e ayudo aki.

Nos a logra e obhetivo, a mantene e cantidad di caso di Covid-19 na un nivel aceptable, y tabatin algun morto pa lamenta. Den su totalidad, ‘good job’ y ban move pues, awor cu nos tin salud sigura, cu e proximo paso, di habri frontera atrobe, pa turista por yega, pa tur empresa por gana placa, pa por tene nan empleadonan na trabao sin ayudo, ‘everybody happy’. Y esey pasobra nos tabata sigur cu a tuma tur precaucion necesario, schemanan laborioso di test den exterior y test na aeropuerto… nada no por pasa nos… nos a kere, anto. E siman cu a pasa aki a pone nos di un solo golpi back den realidad manera cu e ta. Y esey ta cu no por pensa na un manera mecanico di e aparente contradiccion di scoge pa salud o scoge pa economia. Y sigur esey no ta algo di haci esun promer y despues e otro; e no ta traha asina.

Naturalmente no ta asina cu ningun hende no a premira loke por a pasa awor. E reapertura no a bay den fase y e casonan importa a keda reduci. Ta e propagacion exagera entre nos propio hendenan cu tin nos spanta. Y hopi ta puntra nan mes con esey por a sucede. E contesta pa esey ta bastante simple: tabatin importacion di virus y e descuido entre nos mes a haci e resto. E cautela cu mester tabatin tabata ey tambe, pero ta parce cu pareu hende sali di aeropuerto cu un test negativo nan ta liber pa disfruta tur e ‘libertadnan’ cu Aruba ta brinda, sin ningun restriccion. Y e libertadnan ey ta comparti fraternalmente entre esnan pasahero y esnan residente aki: nos tur ta ‘clean’ toch?

Di mal manera nos a haya sa cu e asunto no ta asina simple. Nos a haya un les durisimo pa nos realisa cu no ta pasobra no tin caso conoci, nos por laga bay. Y esey no ta conta solamente pa e ciudadano cu gusta festeha, su bon derecho den tempo normal, pero loke nos no ta tende ta, si nos autoridadnan tabata asina bon na altura di kico mester a sucede, ya cu nan ta percura pa  no perde un ocasion pa gaba con bon trabao cu nan ta haci: unda nan tabata den ultimo luna aki, ora e desastre a tuma lugar? Nos no a ripara tanto di presencia di autoridad den e lugarnan nocturno, cu por a bay back na ‘business as usual’ sin ningun obhecion ni obstaculo. No ta esey ta loke a pone nos unda nos ta awe? E vigilancia tambe a tuma un break, aparentemente.

Claro cu e ciudadano awor ta haya un sermon tras di otro den e dianan aki, y ta urgi nan atrobe pa laba man, tene distancia social, etc. Den varios empresa nan no ta warda pa bin restriccion, nan mes a cuminza impone regla di distanciamento, hopi lugar a cuminza exigi ‘mondkapje’ pa bo por drenta. Nos ta ripara cu inmediatamente ta bin un reaccion pa coregi loke a descuida, y esey ta bon. Tambe nos ta ripara di biaha cu varios empresa a cuminza traha for di distancia atrobe, aunke tin esnan cu di biaha a adapta na e realidad nobo y a sigui opera for di distancia tur e lunanan aki caba, probechando e bentahanan cu esaki ta trece cune.

Cu esey anto, nos ta ‘clear’ e asunto atrobe, aki poco dia nos por sigui cu nos bida atrobe? Esey ta parce nos un pregunta innecesario. E contesta ta NO. Nos tin e parti mas dificil nos dilanti ainda, tambe pa loke ta e parti di salud. Aunke e cantidad di caso ta haltisimo, sigur pa un teritorio asina chikito, nos a bira practicamente lider mundial segun e standard di tanto caso pa un miyon habitante, nos mester mantene e confianza cu nos ta sali atrobe di e problema aki. Mirando e situacion nada facil aki, pa haci bon ‘contact tracing’ cu un staff limita, no ta bay ta facil. Y na un momento asina nos lo bisa: “all hands on deck”. Sin embargo, no ta straño cu si nos ta sclama semper cu nos mester confia riba ‘nos expertonan’, e unico epidemiologo di Aruba no ta den e ‘team’?  Parce cu esey no ta necesario pasobra ta haya conseho di Hulanda y un enfermera tambe por… Algo mescos nos servicio meteorologico cu ta core cu e unico experto anto ta cumpra servicio di Corsou…? Vaya autonomia… Of manera Hospital unda no tabatin mester di un medico specialista pasobra un ‘ziekenbroeder’ tambe por a clear e job ey? Ta di spera cu no ta esaki ta birando parti di e ‘normal nobo’ cu e coronavirus tambe ta trece pa nos, pasobra esey si ta un legado cu nos no mester.