Diabierna ultimo, durante celebracion di e 70 aña di Statuut pa Reino Hulandes, Secretario di Estado pa Digitalisacion y Relacionnan den Reino, Zsolt Szabó a duna un discurso den cual e ta remarca e importancia di e acuerdo aki, e responsabilidad cu e ta trece y ta resalta e conseho di Raad van State en conexion cu 70 aña di Statuut.
Statuut pa Reino Hulandes ta regla e structura basico di Reino y e relacionnan formal entre e paisnan cu ta forma parti di esaki. Statuut a ser firma na 1954 pa e representantenan di e tempo ey di Hulanda, Antias Hulandes y Surinam. E firma aki ta particularmente memorabel pasobra el a marca oficialmente e fin di e sistema colonial cu tabata consisti di e ‘madre patria’ Hulanda y e colonianan den exterior.
Hopi cos a cambia 70 aña despues. Surinam a bira independiente na 1975 y Aruba a bira un pais autonomo dentro di Reino na 1986, separa di Antias Hulandes. Na 2010, Antia Hulandes a keda desmantela. Desde e tempo ey, tres isla den Caribe a haya e status di ‘pais’ autonomo: Aruba, Corsou y Sint Maarten. E otro tres islanan – Boneiro, Sint Eustatius y Saba – ta incorpora como ‘municipionan special’ den Hulanda, e di cuater pais di Reino.
Den su discurso Secretario di Estado Szabó a remarca cu e Statuut ta duna tur pais dentro di Reino Hulandes un posicion igual y ta pone un base pa cooperacion, cu tur pais ta percura pa nan mesun asuntonan. Na mesun momento el a subraya cu esey tambe ta trece responsabilidad y e importancia di wak pa dilanti pa un miho futuro.
“E Statuut no ta djis un cos di pasado. Loke ta skirbi riba papel, nos mester haci’e bira realidad, tur dia. Como Secretario di Estado, mi no kier wak solamente patras, pero specialmente wak dilanti,” el a resalta.
E Secretario di Estado a indica cu e conseho recien di Raad van Sate (Conseho di Estado) riba e 70 aña di Statuut pa Reino ta duna guia valioso y ta identifica oportunidadnan pa mehoracion, pero tambe ta destaca unda resultadonan ta ser logra caba.
Raad van State ta haci tambe varios recomendacion concreto pa trece mehoracion y surpasa retonan cu ainda ta existi.
El a señala cu a pesar cu e Statuut a duna un rumbo na e paisnan durante 70 aña, ainda tin retonan significante cu meste surpasa, manera entre otro, derechonan humano y e posicion economico y financiero di e islanan cu ta rekeri atencion continuo. E conseho di Raad van State tambe ta identifica bon gobernacion como un prioridad.
“Identifica e topiconan aki ta esencial pa traha hunto riba solucionnan, brindando ayudo y asistencia na otro. E momento historico aki pues ta boga pa un vision cla di e futuro di nos Reino. Un futuro den cual e habitantenan di e islanan por construi un existencia stabiel y sigur, sosteni pa perspectivanan economico nobo,” e Secretario di Estado a remarca.
El a sigui menciona cu den su conseho Raad van State ta mustra tambe riba e importancia di e Landspakketnan di cada pais y e rol significante di e Organisacion di Trabou Temporal.
Szabó a splica cu e programanan aki ta duna un contribucion esencial na desaroyo economico duradero di e islanan. Na mesun momento el a remarca cu nan no por ser subestima. “Cooperacion continuo, comprondemento mutuo y tumamento di responsabilidad ta crucial pa su continuacion,” el a enfatisa.
E Secretario di Estado a subraya cu e rumbo cu mester sigui ta den man di e islanan mes y cu ta keda na cada isla, como partnernan autonomo dentro di Reino Hulandes, pa determina con cada isla kier fortifica e perspectiva economico.
El a agrega cu sinembargo, e autonomia aki tambe ta trece cune responsabilidad y a remarca cu haci escogencianan concreto no por ser posponi mas. “Solamente door di tuma accion decisivo nos por probecha completamente di e oportunidadnan cu tin nos dilanti. Y tin hopi oportunidad pa esey. Esaki ta cuminsa cu e generacionnan mas hoben,” el a indica.
El a resalta cu Raad van State ta enfatisa e importancia di enseñansa di calidad halto como e yabi pa progreso riba e islanan y cu na e momentonan aki, hopi biaha nan nota un buraco entre loke scolnan ta ofrece y e habilidadnan cu gobierno- y negoshinan ta exigi.
Esaki, el a subraya, ta pidi pa accion dirigi pasobra ta trata di mas cu djis haya un diploma. Ta trata di prepara hobennan pa e trabaonan di mañan y cu ta ofrece hobennan un perspectiva significante riba un carera exitoso.
Secretario di Estado Szabó a señala cu stimula economianan local tambe ta ser menciona den e conseho di Raad van State y a destaca cu tin iniciativanan prometedor den e area aki.
El a splica cu durante su bishitanan na e islanan el a mira con empresarionan inovativo ta experimentando cu hidroponica, y con fruta y berdura ta ser cultiva den tanki di awa riba e islanan mes.
El a sigui splica cu Hulanda ta liberando recursonan pa amplia e iniciativanan aki riba tur seis isla. Esaki. El a resalta, no solamente ta garantisa cuminda pagabel y saludabel cu ta ser cultiva na cas, pero tambe ta reduci dependencia riba importacion caro.
Secretario di Estado Szabó a indica cu den e cuadro aki, e 66 miyon euro di e fondo di pasado di sclavitud ta ofrece oportunidad tambe pa e islanan. El a splica cu e condicionnan ta haci posibel pa inverti den proyectonan tangibel cu ta contribui directamente na economia y nivel di bida di e poblacion.
“Pensa riba empresarionan cu ta cuminsa cu por crece nan negoshi cu un capital chikito. Pensa riba proyectonan innovativo riba tereno di educacion, deporte, vitalidad y salud mental. Di e manera aki nos ta duna control riba futuro na e habitantenan mes,” el a enfatisa.
Por ultimo el a regresa na e punto di bon gobernacion como un balor nucleo importante for di e conseho di Raad van State. El a remarca cu bon gobernacion ta ser construi riba e fundeshinan di integridad y confiansa. E confiansa aki, el a indica, entre administradornan y gobierno nunca mester ser mina. “Pero manera Raad van State ta enfatisa, corupcion y mal maneho ta menasanan real pa tanto gobernacion como estado di derecho,” el a agrega.
Szabó a indica cu pa haya mas control riba esaki, e ta enfoca riba monitoreo di corupcion riba e islanan y a sigura cu e lo sigui atende cu criminalidad di minamento y transfronteriso, manera corupcion, labamento di placa y trafico di droga. Ademas, el a añadi, e ta enfoca riba fortalece institucionnan pa di e manera aki, e estado di derecho ta wordo ser fortifica mas ainda.
Finalisando e Secretario di Estado a resalta cu e momento aki ta boga pa responsabilidad comparti y a subraya cu ta keda na e islanan mes pa embarca riba e caminda pa un autosuficiencia economico mas grandi. El a remarca cu Hulanda semper lo duna sosten caminda ta necesario y ta tene cuenta cu e circunstancianan unico di cada isla.
“Di e forma aki nos ta fortalece e Reino hunto. Y despues mi ta bolbe na e tres pilar fundamental menciona anteriormente: bon gobernacion, finanzas sano y autosuficiencia economico. Esakinan no ta conceptonan abstracto, pero blokinan di construccion concreto pa un futuro mas fuerte. Un futuro den cual e islanan por florece riba nan mes, exactamente manera e Statuut a envisiona 70 aña pasa. Ta keda na nos tur pa haci e futuro ey un realidad,” el a enfatisa.
