(AP) — Prome minister Benjamin Netanyahu a priminti un “victoria total” contra Hamas y a condena oponentenan Mericano di e guera na Gaza ayera den un discurso candela na Congreso, boicotia pa decenas di legislador Democrata y protesta pa miles buscando pa pone fin na e guera y e crisis humanitario cu a crea.
E discurso combativo di Netanyahu no a duna un señal cu su bishita na Merca – su prome biahe den exterior desde comienso di e guera – lo trece progreso den e lunas di mediacion lidera pa Merca pa un alto al fuego y liberacion di rehennan, manera administracion di presidente Mericano, Joe Biden tabata spera.
Papiando pa casi un ora cu aplauso frecuente di legisladornan Mericano, como tambe silencio di hopi Demorata lider den e camara, Netanyahu a bisa cu Merca a comparti interes den e lucha di su pais contra Hamas y otro gruponan arma cu sosten di Iran.
“Merca y Israel mester para hunto. Ora nos para hunto algo realmente simpel ta sucede: Nos ta gana, nan ta perde,” segun Netanyahu, kende a bisti un pin geel expresando solidaridad cu e rehennan Israeli secuestra pa Hamas.
Pero e lider Israeli a tuma un tono mas scur mientras el a dirigi na esnan protestando e guera na campus universitario y otro sitionan na Merca, haciendo un gesto den direccion di manifestacionnan riba cayanan pafo di Capitol, yamando e manifestantenan “idiotanan util” pa adversarionan di Israel.
Algun rehennan libera for di Gaza, y familiarnan di esnan ainda den captividad, a scucha den camara di Congreso. Seguridad a retira manifestantenan den e galeria cu a lanta pa mustra T-shirt cu slogan exigiendo un fin na e guera y liberacion di e rehennan.
Netanyahu no a papia mucho di e esfuersonan di Merca y su aliadonan Arabe pa negocia un fin na e bataya y un liberacion di e rehennan sobreviviente secuestra pa militantenan lidera pa Hamas den e atake dia 7 di october cu a inicia e guera. El a acusa e cantidad di manifestante contra e guera na Merca di para banda di e militantenan, kende el a bisa a mata baby den e atake di Hamas dia 7 di october.
Dunando su discurso durante prime time di anochi na Israel, Netanyahu tambe tabatin un wowo riba audiencia na cas. Netanyahu, kende su popularidad a cay for di su nivelnan prome cu e guera, tabatin meta pa mustra como un estadista respeta pa e aliado mas importante di Israel y bon bini na Washington. E tarea aki ta complica pa e opinionnan cada bes mas dividi di Mericanonan riba Israel y e guera, cu a bin dilanti como un asunto clave den eleccion presidencial Mericano.
E presentacion den Congreso a haci Netanyahu e prome lider stranhero pa dirigi un reunion conhunto di Congreso cuatro biaha, surpasando Winston Churchill.
Presidente di Congreso, Mike Johnson a duna Netanyahu un bon bini caluroso. Mas cu 60 Democrata, y independiente politico Bernie Sanders, a boicotia discurso di Netanyahu. Hopi Democrata kende ta sostene Israel pero tabata critico di Netanyahu a mira e discurso como un esfuerso di e Republicanonan pa mustra como e partido mas leal.
Merca ta e aliado mas importante di Israel y proveedor di arma y fuente di ayudo militar. Administracion di Biden a bisa cu kier mira Netanyahu enfoca su bishita riba yuda completa un acuerdo pa un alto al fuego y liberacion di rehennan.
E bishita di Netanyahu a yega den sombra di ordennan di aresto busca contra dje pa Corte Criminal Internacional pa supuesto crimennan di guera di Israel contra Palestinonan. Merca no ta reconoce ICC.
