Durante un conferencia di prensa di Gobierno di Aruba y Crisis team di diaranson ultimo, epidemiologo Gareth Tromp di Departamento di Salubridad Publico (DVG) a trece dilanti un actualisacion pa loke ta trata e casonan di Covid-19 na Aruba aunke te ainda e isla no ta afo di e crisis aki.

Tocante e casonan positivo, el a mustra un grafico denomina ‘epidemic curve’ cu e delaster tres siman na unda nan ta mira un reduccion den casonan nobo pa dia, di esaki el a ripara cu tin menos caso positivo den fin di siman compara cu e dianan di mita di siman.

Di mesun manera, Tromp a splica cuanto persona contagia por infecta cu otro cu Covid-19 pa loke na comienso di e di dos wave na augustus e reproduccion tabata hopi halto cu 2 segun Reproduction (Rt) Aruba Covid-19 , despues di esey a cuminsa un reduccion cu e pashentnan infecta den isolacion y door di e medidanan implementa a yega te 0.65 den scala Rt.

Di loke ta trata e positive rate, Tromp a menciona cu esaki ta di cuanto test ta sali positivo di tur test cu ta wordo haci na hendenan malo of hendenan cu sintomanan, pa varios siman esaki a keda hopi halto di un 40% pa 50% y cu despues e positive rate a cuminsa baha cu na e momentonan aki ta na un 15%.

Un otro indicador Tromp a señala cu ta trata di cuanto persona ta admiti den hospital, loke por duna un bon bista cu e casonan di Covid-9 na Aruba ta bahando, segun loke el a sigura.

Tambe, el a splica e importancia di haci test ora e persona ta presenta sintomanan, pa motibo cu ora un persona ta cuminsa desaroya sintomanan dos dia prome cu esey caba e ta contagioso, si e persona ta tarda hopi pa haci test despues cu e ta sinti e sintoma y no a bay den isolacion, tur e dianan ey e persona aki ta contagiando y plamando e virus.

Den e mesun conferencia aki, prome minister Evelyn Wever-Croes a comenta cu e caida di casonan tabata pa via di cooperacion di tur instancia envolvi pero cu te ainda tin hende cu no ta compronde e seriedad di e situacion, cu ta “disciplina e unico solucion y unico forma cu por atende cu e crisis aki”.

Te ayera, tabatin 343 caso activo pa Covid-19, na hospital tin un total di 9 persona interna di e cual 3 ta den cuido intensivo y 6 ta isola riba piso general. Tocante esaki prome minister a bisa cu na september tabatin 1.630 caso activo y den cuatro siman e cifranan a cuminsa baha y esey tin cu sigui te yega na 0 y mantene e isla liber di Covid-19, na luna di september e cifranan tabata di 40 persona den hospital di e cual 10 di nan tabata den cuido intensivo.

Pa via di esaki, operacion di hospital por bolbe bek na normalidad a pesar cu tin un lista grandi di persona cu no por a wordo atendi door cu tabata existi un crisis, prome minister a bisa cu tin un suficiente capacidad den hospital y den cuido intensivo pa atende e crisis pero e ta pone un presion hopi grandi riba cuido medico.

Lamentablemente e cantidad di personanan cu a fayece cu tabatin Covid-19 a yega te 32, algo cu segun prome minister a declara cu ta hala hopi su atencion pa motibo cu e ta preocupa y a enfatisa pa comunidad pa duna mas di nan parti y evita e dolor di perde un ser keri.