Cu dia di Himno y Bandera tras di lomba, unda nos tur por a demostra cuanto nos ta stima nos pais, awor ta diamars y nos ta di regreso den bida di tur dia. Esaki no ta implica cu tur e cosnan bunita cu nos a bisa, o a bisa di lo haci ayera, no mester bolbe na archivo di olvido, pero ta hustamente necesario pa nos no solamente corda, sino cumpli cu nan tambe.

Si no, nos ta haci exactamente loke e poema critico di Joe Fortin, cu a aparece riba pagina 12 di nos edicion di diasabra16 di maart, tabata kier a expone. Manera semper, lo tin cu no ta di acuerdo cu e tono duro di e poema aki, cu ta critica e hipocresia di alaba Bandera y Himno, expresa cuanto nos ta stima nos pais, y pa su mañan bolbe ‘pa orden di dia’ unda contaminacion, destruccion, sobrepoblacion y mal decision ta bringa cu otro pa espacio y prioridad. Pues awe ta e ‘mañan’ despues di e dia cu nos tur ta di acuerdo cu otro cu nos ta stima nos isla; ban wak awor ta ken ta cumpli y ken no.

Den esey tin algun tema cu a atrae nos atencion siman pasa, cu ta di suma importancia pa e Aruba di futuro cu nos ta desea, y pa logra esey nos mester actua consecuentemente. Un ta e problema continuo cu e companianan cu ta gana placa cu extraccion y benta di santo y piedra. Recientemente nos a dedica mas cu un Editorial na e tema aki, pero mirando e discusion continuando, ta importante trece e puntonan cardinal atrobe. Esey ta cu riba un teritorio asina chikito y asina sobrepobla caba, sigui permiti mas destruccion di paisahe valioso, y cada biaha mas scars, absolutamente no ta cuadra cu ningun pensamento den direccion di economia y bienestar sostenibel pa futuro. Es mas, hasta si nos laga tur hende coba santo cu piedra na nan antoho desde awe, pronto e fiesta ey lo caba di tur manera, lagando e pregunta grandi: y kico nos a gana cu laga tur compania sigui gana placa cu destruccion di nos naturalesa, cu tanto nos mester pa den futuro mantene nos isla atractivo pa nos mes y pa nos bishita, cu ta nos actividad economico primordial? Ta importante pa gobierno duna un señal bon cla cu nos ta mira bienestar di nos isla pa futuro y no solamente beneficio economico awor.

Nos ta ripara cu den prensa tin casi un miedo pa haci e pregunta aki na e activistanan cu probablemente e siman aki lo subi baricada pa segundo biaha den dos siman. Nos ta tende di nan banda cu nan ta contra pa prohibi cobamento, pasobra si nan mester bay importa e ta sali mas caro… Y ningun periodista ta haci e siguiente pregunta: “pero no ta abo ta paga esey…?” Si tur hende mester importa, ta crea un ‘level playing field’ cu den hopi otro sector no ta existi y e parti di transporte di e material pa e consumidor (construccion) ta keda cu nan trabao, pasobra construccion no ta depende di unda e material ta bin. Y tocante e prijs cu lo ta hopi mas halto si importa, laga nos investiga si esey ta asina, y hasta cu ta asina, ta keda e realidad cu nos no por permiti cobamento sigui, pa e motibo fundamental cu a splica caba. Esaki ta bin riba tur e argumentonan di molester di stof y boroto pa e vecindario, cu riba nan mes ta argumento valido.

E otro aspecto cu a yama nos atencion ta e noticia di parti di nos prome minister cu e organismo estatal OFAC (Office of Foreign Assets Control) a bin cu un licencia cu ta duna cierto excepcion riba e ‘Executive Order’ di 1 di november 2018 , cu tabata encera e prohibicion di transaccion financiero cu Pdvsa y su subsidiarionan na Merca, cual prome variante (‘License 7’), cu tabata efectivo desde 28 di januari 2019, a haya un di dos variante (7-a) firma dia 14 di maart 2019. E ultimo aki tin di haci cu e cambionan cu a bin den e cosorcio di Pdvsa (cu a keda den man di Maduro) y su subsidiari nan na Merca (Citgo Petroleum Inc.; PDV Holding Inc.; Citgo Holding Inc.) cu a pasa pa e gobierno reconoci pa Merca di presidente interino Juan Guaido, y ta haci posibel cierto transaccion dentro di e parti Mericano, bao di cual tambe ta cay Citgo Aruba Holding LLC, cu ta e holding bao di cual e companianan estableci na Aruba ta cay.

Cu esaki, si nos analisa bon, no a bin tanto cambio den e situacion manera cu e tabata prome cu e sancionnan di januari ultimo a bin aden. E problema di financiamento no a cambia ainda, y lo por cambia talbes despues di e eventual caida di e regimen di Nicolas Maduro y yegada di un gobierno democratico. Aki atrobe e ambivalencia den posicion di gobierno, cu no ta caba di dicidi si nan ta bay pone (atrobe) un industria super contaminante na San Nicolas, o nos ta opta pa un otro futuro mas limpi y mas sano: pa tera o pa lama…?