Siman pasa tabatin porfin e encuentro cu ministro encarga cu enseñansa, pa duna claridad riba desaroyonan den e sector aki, cu special atencion pa dos tema. Nan ta e situacion encuanto Traimerdia y e problemanan alrededor di SPO (Scol pa Ofishi). Realmente nos ta haya e impresion cu di ambos banda di parlamento tabatin cierto desencanto pa e contestanan cu a logra haya di e ministro. Realmente no a haya sa mucho mas cu loke tabata conoci caba y cu e ministro ta sigui cu su plannan, lagando e incertidumbre keda mescos. Esey no por keda asina. Henter comunidad tin derecho riba claridad y sigur un ministro cu ta bin di un partido cu a lucha fuerte contra e partidonan grandi tradicional pa nan falta di transparencia, mester sa miho.

E insatisfaccion mas grandi ta trata e asunto di e futuro di e SPO na Santa Cruz. Si e mandatario ta bisa cu no ta cera e scol, pero nan no ta haya alumno nobo, anto e ta bisando cu otro palabra cu a scoge pa loke na Hulandes yama un ‘kerkhofconstructie’. Si di e manera aki ta ‘phase out’ e scol aki, ainda nos tin gana di tende di e ministro concerni pa ki motibo ta scoge pa e modelo di terminacion aki. Tin cierto tendencia den e grupo cu mester atende e tipo di enseñansa aki cu ta birando mas chikito, loke ta haci cu cierto momento no ta kere cu ta oportuno pa tin dos scol habri?

Nos ta haci regularmente nos propio investigacion den e datonan demografico disponible y nos tin varios aña ta señalando cu nos mester atende e fenomeno di cada aña menos mucha cu ta nace, loke ta causa cu principalmente den e gruponan di 0-4 aña y 5-9 aña tin centenares di mucha menos cu algun aña pasa. Si no tin un inmigracion fuerte di mucha den e edadnan mas abao, loke nos no ta desea tampoco, laga esey ta bon cla, anto nos mester tene cuenta cu den e proximo añanan tin menos necesidad di cupo na scol. Cu esey nos no a bisa nada ainda con esey ta bay tin efecto riba diferente tipo di scol y con esey ta bay ta reparti geograficamente. Esey lo rekeri un estudio hopi mas detaya cu nos ta considera tarea pa departamento di Enseñansa; nos sa cu varios aña pasa tabatin hende na e departamento cu tabata dedica bastante tempo na esaki, y no pornada. Sin e cifranan basico aki bo no por sa ta ki rumbo bo mester scoge.

Awor, considerando cu ta haciendo e trabao aki, ta asina cu e tipo di consideracion aki ta e trasfondo pa e plannan di e ministro? Y si ta asina, pakico e no ta bisa esaki cu tanto palabra? Y si al contrario, consideracion di e tipo aki no a hunga un papel, a base di kico ta aplica un ‘kerkhofconstructie’ riba e SPO na Santa Cruz anto? Pasobra si den futuro tin suficiente demanda pa dos scol, anto for di e principio di acomoda e alumno y su famia lo no ta mas cu normal cu ta percura pa un bon ‘spreiding’ di diferente scol pa por cubri e necesidadnan geograficamente lo miho posible.

Esaki no ta solamente un principio cu mester ta vigente den enseñansa, sino tambe den varios otro servicio na comunidad. Nos por corda e desastre causa pa e politica di gobierno anterior, cu sin criterio debido a cuminsa cera e ‘rayonkantoornan’ di Asunto Social, mientras cu pa hopi aña e oficinanan aki den e districtonan mester a percura pa como servicio publico bo ta ‘mas cerca posible’ di bo cliente, cu ta pertenece na e grupo mas vulnerable den comunidad. Te awe nunca a bin un splicacion drechi pa e situacion aki y te awe no tin un rayonkantoor na Nort, por ehemplo, cu tin su publico cu ta rekeri atencion di cerca.

Pa bolbe na enseñansa, nos no por ta satisfecho cu e splicacion cu a duna te awor den e caso di SPO. Mientras parlamentario di varios fraccion, tanto di banda gubernamental y di oposicion ta mustra nan frustracion den esaki, nos lo kier hiba e asunto mas leu ainda: e ministro concerni no debe nan so un splicacion, sino na henter comunidad. Y si haci esey, sigur e lo haya mas hende cu ta critica su maneho, esey ta semper. Pero ta asina so e por haya tambe talbes esnan cu ta comprende su argumentonan. Sin embargo, pa por haci esey ta necesario pa e duna ‘opening van zaken’ pasobra awor no por tin comprension di niun y ningun.

Mientras cu awor e situacion den un ramo di enseñansa ta los henter e discusion aki, ta importante pa señala cu riba hopi diferente tereno, pafo di enseñansa tambe, tin asunto cu simplemente ta exigi mas informacion di e ministerionan. Temponan a cambia, di hopi asunto fuera di nos pais nos por haya informacion den un frega di wowo. Lamentablemente na nos pais mes hopi biaha nos ta hiba discusion inutil a base di suposicion, pasobra ningun den e debate tin e datonan corecto pa por debati sanamente. Gobierno, manera priminti, mester cuminsa traha riba transparencia den e sentido aki.