E organizadornan di e debate di diarazon anochi por ta satisfecho. Nan a logra pone un bon programa, hopi anima y cu velocidad cu no a conoce momento di caida. Ta di spera cu e organizadornan di e debate di Camara di Comercio a scucha y mira cu atencion, pa nan ultimo debate tambe bira un exito.

Fuera di esaki nos no a mira tanto cambio den e ‘performance’ di e lidernan; esunnan cu a bay bon siman pasa den e anterior debate tabata tambe aki esunnan cu a luci mihor. Bon escogencia tabata e actuacion di e candidatonan ‘milennnials’ cu a añadi un toque extra na e evento, aunke aki tambe a surgi e mesun fenomeno cu por a mira entre e lidernan tambe: persona cu amplio experiencia banda di otronan cu tabata lidia cu cierto tema di cual obviamente nan no tabata informa. Ta facil pa argumenta cu ‘experiencia no ta tur cos, wak unda experiencia di esnan cu a goberna te awor a hiba nos’. Nos lo bisa “touché”, ta berdad cu e partidonan cu mas ta claim experiencia ta net esunnan cu mas tabata envolvi den gobernacion di calidad inferior.

Sin embargo, esey no ta motibo pa glorifica falta di experiencia tampoco. Cualkier gobierno mester di cierto experticio, y cu esaki no necesariamente mester ta concretisa den e persona cu ta bira parlamentario o ministro mes, esey tambe ta obvio. Es mas, loke ta falta den gobernacion pa hopi aña caba, ta cu no tin un vista cla con ta para cu profesionalisacion den e aparato publico, hustamente pasobra esaki a bira un asunto politiza. Tanto e nombramento den e despachonan di e ministronan, pero tambe e criterionan obhetivo pa percura pa di berdad e experticio ta presente den e aparato, no ta aparece ningun caminda.

Ta bisa suficiente cu en todo caso no tin un base amplio entre e competidornan pa trece mas transparencia den operacion di gobernacion, en todo caso nos no ta tende esey bon cla di mayoria. Esey no ta un bon señal, ya cu den e reforma y mehoracion di e aparato, pa cual e acuerdonan basico ta firma caba, for di e punto di vista Hulandes esaki ta un di e puntonan di accion importante. Por a ripara den e debate aki tambe cu e acuerdo pa ehecucion di e reforma ta colga manera un nubia scur riba e debate, pero asina mes mayoria di e partidonan ta opta pa no referi tanto na esaki. Sin embargo, un di e partidonan cu mas a sobresali den e debatenan di siman pasa y di e siman aki, ta trece e diferente puntonan di e acuerdo cu enfasis dilanti y ta cosechando bastante atencion cu esey. Dia di eleccion lo nos sa definitivamente si esey tabata un strategia sabio of no. Por lo pronto esaki ta hayando menos acogido entre e partidonan, unda varios ta opta pa e tactica di ‘we will cross that bridge when we get there’. Esey ta nan pleno derecho naturalmente pero alavez ta duna e debate un toque irreal. E ta duna e campaña un aspecto di ‘ban trata di luci bon den campaña, ignora e hechonan, gara poco asiento y despues ta wak kico tin’. Y mientras nan tur sa loke ta bin despues, pasobra e ta poni preto riba blanco caba, y pueblo mester claridad.

Ademas, lo ta mas cu logico pa supone cu un di e partidonan grandi lo ta den mercado pa forma e siguiente gobierno. Esey cu mas probabilidad lo ta e partido di e actual Promer Ministro, cu ta luci bon den e debatenan y tin mehoracion di situacion economico y control riba Covid-19 na su fabor. En cambio su rival grandi ta mustra menos anima den e debatenan, mientras ta un interogante ainda cuanto efecto e caso hudicial ta bay tin riba dia di eleccion. Na 2017 e partido a perde mas di 10.000 voto, causa pa maneho financiero desastroso di e pais y e caso contra e ex-ministro di Labor. Despues di cuatro aña no asina briyante den banki di oposicion ta dificil pa mira un base pa e lema di campaña cu ta ‘rescate di e pais’. Tabata remarcable cu ora e famoso ‘huelga di hamber’ a drenta e ultimo debate aki, e ex-mandatario a trece dilanti cu si ta necesario haci algo asina extremo, ta considera hacie atrobe. Nos ta spera cu e no tabata papia en serio, pero por si acaso esey tabata e caso, e no mester lubida pakico na 2014, despues di tanto dia bao palo di kwihi, e tabata obliga di bandona e lugar unda e tabata incita contra representante di Rey. Ademas, mayoria di Aruba a rechaza tal manera di actua totalmente y, en todo caso, pa nos pasa den e berguenza ey atrobe, e lo mester gana e proximo eleccion cu broche de oro, algo cu nos ta mira como un posibilidad remoto.

Loke ta parce nos mas probable ta cu den e simannan cu falta lo surgi un mayoria cu ta dispuesto pa tuma e acuerdo cu Hulanda como punto di salida, y den e cooperacion ey haci lo maximo cu mester, y por, na bienestar di Aruba. Esey ta e realismo cu nos mester, y cu por haya un apoyo electoral mayoritario. COHO tey awor, y despues sigur.