Parlamentario Rocco Tjon a declara na Bon Dia Aruba cu su fraccion di MEP a tuma nota di e preocupacion cu e gremio comercial a yega di vocifera recientemente, tocante e cambio riba e ley di reforma fiscal cu ta na caminda pa wordo trata den parlamento, eventualmente e luna aki.

Na momento cu e entrevista aki a wordo realisa durante e ultimo siman di fin di aña 2019, e parlamentario menciona no tabatin un bista cla di e pakete fiscal cu gobierno tin pensa di bin cune pa atende cu presupuesto 2020. Na e momento ey, Tjon a bisa cu dificilmente e por reacciona riba e preocupacion expresa pa cinco representante di e gremio comercial, sin cu prome e por haya e producto di e reforma fiscal, pa asina e por sa riba kico e por reacciona.

E presupuesto aki mester produci un surplus di 25 miyon, segun e norma di LAft y tambe segun e protocol cu gobierno di Aruba a firma cu Hulanda.

Aumento di deviezenprovisie.
Tjon a bisa na Bon Dia Aruba cu obviamente e sa cu den e reforma fiscal e deviezenprovisie lo wordo introduci a base di informacion publica den media.

Bon Dia Aruba a publica ayera un declaracion di minister di Finanzas y Economia, Xiomara Ruiz-Maduro kende a bisa cu e deviezenprovisie ta conoce un aumento di 0.6% dia 1 di januari 2020. Den e caso di deviezenprovisie, gobierno por a mira un espacio pa subi di 1.3% pa 1.9%.

Despues di e dianan di reces den cuadro di e fiestanan di Pasco di Nacemento y Fin di Aña, y awor cu un delegacion di parlamento a biaha pa Corsou pa un reunion bilateral den cuadro di e preparacion di e reunionnan Interparlamentario di Reino, no tin un desaroyo nobo riba tratamento di e cambionan di e ley di reforma fiscal. Pero Tjon a laga sa cu unabes cu e ley di e pakete di cambio riba e reforma fiscal cu ta canando su caminda legal yega parlamento, nan lo haci nan preguntanan. No ta cuestion cu nan lo tabatin intencion di pasa un ‘fastball’ y introduci cierto belastingnan.

Segun lider di fraccion di MEP, for di cu gabinete Wever-Croes a asumi su responsabilidad no a haci esaki, y e no ta kere cu esaki lo wordo haci tampoco. E parlamentario a accentua cu e deviezenprovisie no lo touch e ciudadano, manera un sugar tax.

Sinembargo e mandatario a yega expresa na e matutino aki cu no solamente e companianan sino e ciudadano lo contribui na caha di gobierno via e deviezenprovisie.