Den cuadro di carnaval 65 Minister Bikker kier pa tur hende celebra den forma responsabel

ORANJESTAD – Cantidad di incidente a tuma luga durante e fin di siman di carnaval tras di lomba. Minister di husticia, Andin Bikker, a haci un apelacion na comunidad pa realisa cu nos ta un ‘happy island’, manera nos logo ta bisa. Pero esey no ta kita cu cada un di nos mester ta responsabel den cuadro di celebracion di carnaval.

E tin cu bisa cu un siman prome, ora cu carnaval 65 a start cu e parada di flambeu, tabatin alrededor 11 mil hende riba pia, y el a bay relativamente trankil. Sinembargo, e fin di siman ultimo, e por a ripara cu tin hopi violencia innecesario ta tuma luga. E tabata ta un fin di menos magnitud compara cu e fin di siman di e prome parada di carnaval, tabatin basta conmocion.

Pero e mandatario a declara cu nan tin un solucion ‘palpabel y concreto’ pa loke ta trata ekiponan cu mester suministra na cuerpo policial (KPA). Pero e apelacion ta bay pa e comunidad, ya cu e responsabilidad primordial ta keda ariba nos pueblo. E ta recorda cada miembro di nos comunidad pa ‘bay celebra, pero den un forma responsabel’.

Segun e mandatario, no solamente e ta ripara kico ta pasa; pero como minister di husticia e ta wak con nos por mehora e situacion aki. P’esey el a duna prioridad pa busca brommernan nobo pa e unidad di polis motorisa. E agentenan di unidad aki, generalmente gran parti di cualkier actividad, nan ta tuma e control y nan ta mas flexibel pa move den trafico y mantene ordo publico. Igualmente –segun Bikker– nan ta buscando mas material nobo pa cuerpo policial. Aña pasa a wordo busca casi 95 vehiculo nobo pa KPA. Igualmente nan a percura pa otro materialnan manera uniform nobo, computernan, etc.

Tambe Bikker a anuncia cu pronto lo tuma luga e apertura di un post of oficina nobo di polis den area turistico di centro di ciudad, cerca di nos waf di crucero y e joyerianan riba boulevard. E oficina aki tabata situa inicialmente den un local di Renaissance Marke Place, y awor e ta bay muda pa un localidad nobo y mas visibel. El a agrega cu esaki ta pas den e plan di maneho aproba recientemente pa parlamento. E unidad policial aki ta bay concentra nan mes riba siguridad di turistanan cu ta e pilar economico principal di nos pais.