PR di departamento di Salubridad Publico (DVG), Jurette Croes, a laga sa cu nan por observa cu e flexibilisacion di e shelter in place y e habrimento di e prome fase a haci cu comunidad a cuminsa move hopi mas. “Mas eigenlijk cu a premira esaki,” el a declara. Esaki ta refleha cu comunidad ta sintiendo hopi safe afo.
Nan por a tuma nota cu den oranan di anochi, specialmente prome cu 10’or, tin hopi accidente di auto tumando luga. Personanan cu ta keda te anochi laat ariba caya, y despues nan ta core duro pa yega na nan cas prome cu toque de queda (TDQ) pa nan no haya un boet dura TDQ.
El a haci un apelacion na e personanan cu ta procede di e manera aki. Mirando e situacion cu nos ta pasando aden, “no ta prudente pa nos bay ocupa nos camanan di ICU cu victimanan di accidente di trafico,” el a bisa.
Aruba ta preparando pa e siguiente fasenan cu ta na caminda, y nan ta premira cu eventualmente e casonan lo por aumenta cu e introduccion di cada fase di flexibilisacion di e shalter in place. Esaki tabata un motibo cu a percura pa aumenta e capacidad di ICU.
Un bes mas el a haci un suplica na comunidad pa sigui comporta nos mes, y pa nos mantene nos mes na tur e medidanan di precausion. “Pasobra ta depende di nos comportacion si e siguiente fase ta bay habri uno pa uno,” segun PR di DVG.
