Departamento di Obra Publico mediante un publicacion riba su rednan social a informa cu entrante mañan diaranson 15 di maart 2023 ta bay cera e caminda di un solo direccion cu ta paralel cu e parkeerplaats cu ta den construccion na Baby Beach.
E caminda di un solo direccion pa yega na Rum Reef Bar & Grill, lo wordo cambia temporalmente pa trafico den ambos direccion.
Motibo di e ceramento di caminda ta pa kita e sero di santo blanco pabou di caminda y despues tuberianan bou di caminda.
Lo cera e caminda menciona pa tur trafico for di 7or di mainta te cu 4or di atardi y esaki lo tin un duracion di 7 dia di trabou.
Proyecto di Baby Beach ta den pleno ehecucion cu e fase 2 dedica specialmente pa e area di parkeer nobo manera minister di Turismo Dangui Oduber a sigura na februari ultimo.
E fase aki tambe ta inclui pa pone iluminacion nobo y construi un rotonde nobo. Ta bay tin bañonan publico pa tur bishitante, lo pone tambe dos kiosco caminda hende por bay cumpra cuminda y/of bebida. E meta ta pa e kiosconan aki refleha e cultura Arubano y bende cuminda nan cu ta tipico den e area di Caribe.
Pronto den e lunanan nos dilanti gobierno lo cuminsa cu e destaho publico pa asina cuminsa cu Fase 3 di e proyecto di Baby Beach. Den e fase aki lo renoba e 2 veld di tennis, tambe lo traha riba un veld multifuncional cu por wordo usa pa beach tennis, beach volley y beach soccer. E gazebo memey di e veldnan di tennis lo bira un restaurant y lo renoba e trapi banda di esaki tambe uzando arte di mosaico. Tambe ta bay hala e turtle wall mas atras, yena e area cu santo blanco pa asina haci e beach mas grandi.
