Diaranson pasa, Secretario di Estado pa Asuntonan di Reino, Raymond Knops, a tene un charla na centro di prensa Nieuwspoort na Den Haag, riba invitacion di e Genootschap Nederland -Aruba. El a referi extensamente na e relacion entre Hulanda y Aruba, y den esaki a haci e comparacion cu e mata dividivi.

Knops, papiando riba tema manera derecho humano, siguridad legal y bon gobernacion como e principionan di e relacion, cu ta mescos e parti externo di e troncon, cu a bira duro y fuerte a traves di tempo. Tambe di e frutanan di e mata, cu ta manera e frutonan di e relacion. El a expresa su confiansa den e bon colaboracion entre Hulanda y Aruba, manera dos amigo cu mester por bisa otro e berdad ora esaki ta necesario. Contestando pregunta for di e sala, Knops a enfatisa importancia di e acuerdonan na cual a yega tocante supervision financiero y cu mester haya cumplimento.

Den su comparacion, Knops ta referi na e manera con e dividivi ta resisti contra agresion di elementonan, solo, biento, awa salo, y no ta entrega. Na luga di kibra pa biento fuerte, e ta prefera di dobla, y sigui crece. Knops ta mira aki un cierto similaridad cu e relacion entre Hulanda y Aruba, cu a pasa den biento y marea pa varios siglo, y ainda ta existi.

Knops a referi na derecho humano, siguridad legal y bon gobernacion, den conformidad cu articulo 43 di Statuut, como e principionan inalterable di e relacion, compara cu e casca fuerte y duro di e mata. E otro aspectonan ta manera foyo, cu por cay y bay perdi, pero cu ta crece atrobe. Pa un isla chikito manera Aruba, ta dificil pa mantene un aparato hudicial independiente riba su mes. Y sin colaboracion den logra haya orden den finanzas publico, y mantene esaki tambe, mercadonan financiero internacional ta mira gobierno (di Aruba) cu otro wowo. Esey ta resulta den otro ‘outlook y rating’. Di otro banda, segun Knops, Hulanda tin bentaha economico di e colaboracion cu Aruba como ‘gateway’ pa Merca, Centro- y Suramerica.

Tambe Knops a menciona e periodo cortico den cual Aruba mester a construi e capacidad politico-institucional pa gobernacion propio democratico y logra crecemento economico. “Cu admiracion y aprecio nos por a mira den transcurso di mas di 30 aña con boso – sin recurso natural y cu un economia sin agricultura y industria di importancia – a logra yega na un nivel di prosperidad mas halto cu tur otro isla y pais den e region. Esey, merece un compliment.”

“Desde mi inicio den e funcion na 2017, sin embargo, mi a siña conoce tambe e desafionan di e diferente islanan. Nan ta diferencia fuertemente entre nan. Desempleo hubenil na Corsou ta halto. Pobresa na Bonaire na cierto momento ta doloroso. E administracion financiero na Aruba ta preocupante. Esey ta zona severo, pero ta trata di e esencia di nos relacion como estado: e garantia di siguridad legal, calidad di gobernacion, ambos esencial pa un clima di inversion adecua. Y net entre amigo ta bon pa bisa otro e berdad, ora ta necesario, tambe ora ta trata di finanzas publico y e supervision riba esey.”

Nota di redaccion:
Lamentablemente, den su comparacion, e Secretario ta haci referencia na e mata conoci na Eagle Beach cu ta aparece riba miles di potret, cu obviamente no ta un dividivi, sino un fofoti. Pero por lo demas e comparacion tin su merito.

E organisacion Genootschap Nederland-Aruba (GNA) a ser funda na 1997. Nan meta ta pa fortifica e lasonan entre Aruba y Hulanda, y na Hulanda promove un vision corecto y balansa di e desaroyonan cultural, social y politico na Aruba. Pa esaki Genootschap Nederland-Aruba ta ofrece regularmente charla y simposio como plataforma pa intercambio di posicion y pensamento encuanto e relacion entre Aruba y Reino Hulandes.