Despues cu a keda conoci cu tin un caso na Merca unda cu un persona a haya e virus Zika despues di a tene relacion sexual cu un persona cu Zika, diferente estudionan a cuminsa wordo haci. “Si esaki ta un hecho, berdad e por wordo considera un STD.” Sra. Maribel Tromp di DESPA a contesta Bon Dia.
El a splica cu esaki ta algo particular mirando cu e ora no ta e sangura so por transmiti e virus sino e ser humano tambe. E virus a wordo haya den e sperma di e hende homber cual ta laga preguntanan habri cu ta investigando, pues ki efecto esaki por tin pa un baby concebi den e caso aki, Sra. Tromp a bisa.
Tin estudio haci internacional na 2013 unda cu a investiga unda tur e virus ta concentra na curpa di e ser humano, y a haya e virus den scupi algun dia despues di infeccion y mas cu 10 dia despues ainda tambe den orina, casi un siman despues cu ya e no ta den e sanger. Otro estudionan a haya e virus den lechi di pecho di mama cual a infecta e baby den e caso aki tambe.
Mirando e desaroyonan aki mas y mas organisacionnan grandi ta enfoca riba conscientisacion pa prevencion.
Directornan di PAHO ta urgi pa compromiso politico y mas recurso pa bringa contra ZIKA
Mas recurso ta urgentemente necesario pa bringa contra propagacion di Zika y aumento di casonan relata di microcefalia y otro complicacionnan segun Pan American Health Organization/World Health Organization (PAHO/WHO)
Tur pais den e continente Mericano mester aloca recursonan pa aumenta e control y esfuerso pa combati sangura, prepara nan servicio di salud pa e demanda creciente, campaña pa educa publico y monitor con e virus ta plama y aumento di casonan sospechoso di complicacionnan causa pa e virus, incluyendo microcefalia y sindroma Guillain-Barre.
“E trabou aki ta rekeri mas sosten di nivelnan politico di mas halto,” segun Sra. Etienne a bisa durante di un reunion di salud recientemente. Despues Sra. Etienne a anuncia un strategia nobo na PAHO pa yuda paisnan mitiga e impacto di Zika aumentando nan habilidad pa detecta e introduccion y propagacion di e virus, reduci populacion di sangura, sigura cu tin e cuido medico necesario, y den forma efectivo comunica cu publico e riesgo y medidanan di prevencion. Pa implementa e strategia aki, PAHO ta buscando inicialmente 8.5 miyon dollar for di comunidad internacional pa sostene e esfuersonan aki.
Mientrastanto ainda e casonan di microcefalia (mas di 3000) raporta na Brazil ainda ta bou di investigacion pa loke ta e conexion cu Zika. Sra. Etienne a bisa cu buraco den e conocemento tocante Zika lo no mester tarda e accion pa bringa contra e virus. Esaki a bin despues cu a anuncia cu e virus ta wordo considera un emergencia di salud publico mundial. Echo ta cu ta trata e mesun sangura cu ta responsabel pa transmiti chikungunya, dengue, gele koorts, awo Zika tambe, pues e manera di mas efectivo ta pa evita pica di sangura y reduci poblacion di sangura.
