Den caso di “Panama Papers” FIOT lo actua si tin indicacion di ilegalidad na Aruba

Aunke na Aruba un compania offshore por funciona den un structural legal totalmente, e no a florece manera na Corsou cu si a bira un sector hopi importante, segun minister di Finansa, sr. Angel Bermudez.

E mandatario a señala cu den añanan di bonansa caha di gobierno di Corsou tabata percibi entre 300 pa 400 miyon florin via impuesto. Pero na Aruba nunca e sector aki a desaroya hopi pa  motibo diferente falta di experiencia y di institutonan internacional.

Fuga di capital

Minister di Finansa, Bermudez a bisa na Bon Dia Aruba cu e “fuga di capital” tin diferente motibo, ya sea pa motibo di regimen fiscal cu tin den cierto momento den un pais. E ta indica cu si nos ta wak den paisnan den bisindario, e hendenan ta emigra nan capital pa motibo cu no tin confiansa den e regimen cu tin pa motibo cu nan ta wordo expropia of kita fei di nan. 

E tipo di hendenan aki ta establece nan capital den otro hurisdiccion. P’esey nan ta uza entidadnan huridico ya sea na Panama cu actualmente ta den luz internacional cu e caso di “Panama Papers”.

E ta haya cu naturalmente bo cu keda cu e parti legal cu bo mester cumpli cun’e. E ta splica cu si pa ehempel e capital ey ta genera entrada bo tin cu registra esey na momento cu bo ta gosa di dje.  “Si esey no ta e caso henter structura ta bira ilegal”, el a bisa.

Minister Bermudez a declara cu abo por tin bo capital afo, ya sea na un banco na Miami of unda cu ta, pero tanten bo ta registra e interesnan cu bo ta haya fei di esey den e pais unda bo ta residencia, e ta kere cu no tin niun aspecto ilegal cun’e.

Control

Mecanismo di control a wordo introduci pa evita cu pagado di impuesto local lo por haci uzo ya sea di empresanan estableci na Panama y/of otro paisnan pa evita di paga impuesto pa medio di compania offshore den paraisonan fiscal. 

Den e caso di Panama Papers cu e mandatario a yega di referi na dje den varios ocasion den e matutino aki, e ta sigur cu si pa ehempel ta sali afo indicacionnan of informacion  cu na Aruba supuestamente lo por tin  aspectonan di ilegalidad, e departamento di FIOT di oficina di Impuesto (SIA), lo sa di actua.

Ademas nan lo sa di uza e informacion aki pa nan por cobra e impuesto cu nan mester cobra fei di principio pa caha di gobierno.  FIOT ta e team di ultimo recurso di control. Nan ta wordo yama aden ora cu ta surgi problemanan serio caminda cu ta wordo sospecha di fraude of cu tin falsificacion.