Hues a bay di acuerdo cu e peticion di fiscal pa duna e tres sospechoso principal den e caso di labamento di 44 miyon euro un sentencia di 5 aña den prizon.
Ramon Helgers (un di e doñonan di e restaurant famoso na Aruba, Madame Janette), Rupert Genser y José De Sousa a scucha e sentencia dialuna contra nan.
Polis a pone man riba man riba e 2 sospechosonan, Helgers y Genser 23 di juni 2015 momento cu nan a haya e dia anterior un di e containernan cu e placa scondi den galiña di un balor di 2.8 miyon euro. Autoridadnan Venezolano a extradita e sospechoso de Sousa bek pa Aruba na april 2016.
Tambe hues a dicidi cu e placa cu a confisca durante e entradanan hudicial lo no bay bek pa e sospechosonan y lo cay pa pais Aruba (verbeurd verklaard). Esaki ta conta pa e 2.8 miyon euro haya den e container. Pero tambe e suma di 1.5 miyon florin di sr. Helgers y 670.000 florin di sr. Genser. Na sr. Genser su cas un polis a sak door di e blafon y asina nan a haya e placa scondi di 280.000 euro. Husticia tambe a confisca e placa aki y lo no duna esaki bek. Tur e placa ta bay den e fondo special pa combati criminalidad.
Corte a tene cuenta cu e echo cu e sospechosonan tabata culpabel di labamento di placa pa un tempo largo, cual a acumula e miyones di euro, cual tabata bay di Hulanda pa Venezuela, via Aruba, pa yega na e decision. Ta masha probabel cu a placa aki a bin di traficacion internacional di droga, y labamento di placa criminal ta un menasa pa economia di Aruba y ta atacha e integridad y transparencia di trafico financiero y economico di Aruba, segun hues.
