Emocion ta mal consehero!

Ora nos a kere cu e stof cu a lanta den e caso di e descontinuacion di e proyecto di rehabilitacion a cuminsa baha caba, ta parce cu ta awor e ta bay cuminsa. Te cierto punto nos por comprende cu un mandatario ta mustra preocupacion ora e mester confronta e situacion, esey ta logico. Y si di berdad e ta preocupa, e ta cuminsa cu bay den su seno, consulta cu su asesornan pa mas pronto posibel sali cu un opinion cu ta mustra conocemento y compromiso. E ultimo aki sigur a keda demostra den e ultimo expresionnan di nos ministro encarga cu labor, pero e prome aspecto a briya pa su ausencia. Kico ta e caso anto?

Ora cu presenta un situacion asina, ta importante pa averigua prome ken ta ken, y ken bo tin bo dilanti, na nomber di ken. Nos a haya bishita di dos cabayero, cu ta traha pa Citgo Petroleum Corporation, estableci na Houston. Un (Cristman) ta segun Citgo mes VP y general manager di e refineria di Citgo na Lemont, Illinois. E otro (Elizondo) ta government & public affairs manager na Citgo, Houston. Unda e director di e compania(nan) local di Citgo a keda? No ta nan mester atende e asunto aki? Den caso di Citgo Aruba refining NV como tambe Citgo Aruba terminal NV, nan tin cinco director, y tur tin autorisacion completo. Sinembargo, ta bin dos hende di Citgo na Houston, cu a declara bon cla na 2016 cu nan no ta responsabel pa financiamento, pero solamente ta duna asistencia tecnico den e proyecto. E responsabilidad huridico tambe di ningun manera ta cay pa Citgo petroleum corporation, pasobra den e structura total di Citgo/PDVSA nan no tin ningun vinculo huridico cu ningun di e companianan na Aruba di Citgo, cu ta cuatro en total, ni cu e holding directo na Merca di e cuatro subsidiarionan aki, cu ta Citgo Aruba holding LLC, cu ta subsidiario di PDV holding Inc. cu na su turno ta propiedad di PDVSA. Ademas, Citgo petroleum no ta parti di e convenio di 2000 pagina cu a firma na juni 2016.

Ta parce nos anto un prome bon pregunta di e combersacion cu mester a tuma luga cu nos autoridadnan: Who are you? Y ken bo ta representa? Unda boso doñonan Venezolano a keda? Y unda e directornan local a keda, entre nan hasta hende local? Y kico boso ta bin para aki? En todo caso, esey ta gepasseerd station y ta mas cu bisto, pa nos hopi prome cu esey caba, cu henter e proyecto aki no tabata avansa di ningun banda. E daño ta haci y ta cay principalmente riba esunnan cu a perde trabao cerca contratista. Pero aki ta cuminsa otro capitulo di embarassment. Aparentemente, den un intento pa mustra cu toch e ta dispuesto di haci algo, e mandatario a vocifera rabia y critica riba Citgo, cu e cos aki no ta bay asina y cu e ta instrui departamento di Labor pa no otorga ningun permiso di retiro… E sa o no sa cu e hendenan cu ta traha cerca contratista casi semper ta traha riba contracto di corto duracion, cu e clausula cu e convenio ta termina ora e proyecto termina. E compania cu a contrata e contratista pa cual nan ta traha a laga e contratista sa cu no tin trabao mas, y esaki ta haci uzo di e contract pa notifica e trahadonan cu nan no tin trabao mas. Esaki ta duro pa e trahadonan, claro, y nan no ta gana nada cu nos simpatia, pero esaki ta e realidad den cual nan ta biba semper. En todo caso, departamento di Labor no por haci nada pa nan, si no ta busca otro empleo, y cu diligencia por fabor.

Ta keda e caso di esunnan cu eventualmente tin un convenio di trabao indefini. Pa nan si e dunado di trabao, cualkier cu e ta, mester haya permiso di director di labor. Pero den su responsabilidad di ehecuta e ley cu ta regarda retiro, e no por tuma instruccion di e ministro, pero mester haci un evaluacion bon di henter e proceso di retiro, inclusivo dos ronda di consulta di e comision di retiro cu empleado y doño di trabao, pa dicidi si ta sigui conseho di e comision di retiro of no. Si e no ta sigui e recomendacion, e mester naturalmente duna argumento solido pa esaki. Finalmente, e director y su consenshi ta tuma un decision. En todo caso, e mandatario di turno no ta aparece ningun caminda den henter e asunto legal aki.

Kico nos por siña di tur esaki? Cu pa cuminsa nos no ta den campaña mas, y ta necesario pa adapta e estilo di atende asunto. No mester lubida cu e ministro ta ministro tambe di esunnan cu no a vota pa su partido. Den e caso particular aki, ta importante pa enfoca riba damage control na beneficio di e trahadonan cu a perde trabao. Den nan ramo lo no ta facil, pero por ta cu tin entre nan hende cu ta dispuesto di bay otro sector economico. Purba facilita esey cu curso, etc. Esey ta goberna.