Den carta pa Staten Presidente di Staten ta reconoce cu mocionnan tabata ilegitimo

E noticia aki a aparece riba front page di nos corant edicion di diasabra dia 31 di october. Sinembargo, pa un fayo tecnico e noticia no a sali debidamente den e corant. Nos ta publica esaki hunto cu nos disculpa.

Den un carta fecha 30 di october 2020, cu redaccion di Bon Dia Aruba a haya pa mira, presidente di Staten a reconoce dilanti su coleganan cu e mocionnan aproba sin presencia di un mayoria di miembro dia 15 di october, no ta cumpli cu e requisitonan di articulo III.16 di Constitucion, ni cu e requisito di presencia stipula den articulo 27 di Reglamento di Orden di Staten. Por lo tanto mester considera e votacion, como tambe e resultado di e votacion, como haci di manera no valido y por lo tanto tambe nulo.

Na e momento aki no ta cla ainda kico lo ta e consecuencia politico di e anuncio aki. Tanto conseho di ministro como e fraccionnan cu ta sostene e coalicion, cu excepcion di e fraccion di RED, a apoya e punto di vista di e presidente den e dianan despues di e reunion cu hopi conviccion. Awor ta bin resulta cu e mes ta admiti cu su decision pa laga e votacion sigui tabata completamente eroneo. Mas ainda, henter gabinete a bay di acuerdo cu e posicion aki, di cual varios comentarista a bisa cu e decision di permiti e votaciona sigui tabata absolutamente sin base legal. E pregunta ta awor kico gobierno ta bay bisa di e asunto aki, y ki conclusion lo mester tuma encuanto e posicion di e presidente di Staten.