Durante un hoorzitting di e LAR bezwaaradviescommissie, cual ta un comision legislativo unda ciudadano por bay apela decision di gobierno, e hefe di departamento cu ta duna permiso a acusa ministernan di otorga permisonan directo sin cu e sa.

E hurista Eileen Semerel a declara esaki den un caso di un ciudadano cu a apela un permiso di molester (hindervergunning) duna na un restaurant na San Nicolas pa cu zonido. Sra. Semerel cu ta encarga cu e departamento di permiso cu ta cay bou Directie Wetgeving, a mustra durante e tratamento di e caso cu e no tabatin e informacion pa asina defende gobierno su banda.

E motibo cu el a duna ta uno hopi remarcabel y ta bay contra bon gobernacion. El a indica cu: “Mi no sa nada di permisonan duna recientemente como cu ta aña electoral y hendenan ta acercando ministernan directo pa pidi permisonan. Y nan ta haya nan tambe.”

Asina e ta sugeri cu e procedura normal di otorgamento durante aña di eleccion no ta cana manera mester ta. Bon Dia Aruba a puntra minister di Husticia Arthur Dowers pa duna un comentario. “Absurdo. Ami no ta traha asina y e procedura ta bay manera mester bay.” E mandatario tambe a mustra su duda den e declaracion aki, te ora Bon Dia Aruba a mustra cu e hurista a haci esaki dilanti e comision LAR y cu nan tur ta testigo inclui e ciudadanonan cu a apela e caso. Despues e mandatario a yama e director di Directie Wetgeving pa asina haya un aclaracion.

Polis cu man mara ora minister ta firma
Esaki a sosode ayera mainta. Atardi Bon Dia Aruba a yega na un caso unda un grupo di ciudadano cu a haya dos kavel pa campa na Baby Beach a haya nan mes den un situacion cu permiso tambe. Den e caso aki un señora a pone un hut riba beach publico desde aña pasa unda a indica cu e tin permiso di gobierno. Sinembargo e hut aki ta cay mey mey di e kavelnan pa campa y e aña aki a duna permiso na e grupo pa campa, asina creando un situacion fastioso pa ambos partidonan.

Sinembargo locual a capta nos atencion ta cu e señora en cuestion a logra di haya un permiso pa construi algo riba beach publico cual ta contra ley. Ora e grupo a puntra e polis dicon nan no ta actua contra esaki, nan ta indica cu nan ‘man ta mara’ den caso cu minister a duna permiso. Un contesta cu ta mustra atrobe cu un minister ta actua riba ley, cual ta ilegal y contra bon gobernacion.

Finalmente a resulta cu e señora no tabatin un permiso valido mas y nunca tabata permiti pa e traha un hut riba e beach. E pregunta a keda: dicon polis y tampoco e instancianan di gobierno (DIP) no a actua y forsa e señora pa kita e hut? Tambe e pregunta ta keda dicon dos polis na warda di San Nicolas ambos ta indica cu ora tin un permiso firma door di un minister, ta declara cu nan no por haci algo, ni den e caso e permiso ta bay contra ley vigente.

Bon Dia Aruba ta keda riba e casonan menciona, entre otro pa mira con ta bayendo cu e otorgamento di permisonan. E asunto aki no ta algo nobo. Diferente rapportnan a base di investigacionnan di integridad y bon gobernacion den pasado (di gobiernonan di MEP y AVP) ya a conclui cu durante aña electoral permisonan ta wordo duna en turno di voto. Nos kier mira si esaki tambe ta e caso atrobe den e aña electoral aki.