Den aña 2021 Gobierno ta sigura sosten social y na economia di nos Pais; Ta presupuesta 96 miyon pa sosten social y 362 miyon pa sosten na economia

Den conferencia di prensa diahuebs ultimo, Minister di Finanzas, Economia y Cultura, Xiomara Maduro a informa cu den aña 2021 Gobierno ta keda brinda yudansa pa sigura e sosten social y sosten na economia di nos Pais den e momentonan aki di e crisis cu e pandemia di COVID19 ta hinca nos Pais aden.

Segun un comunicado di prensa, e mandatario a indica cu a presupuesta 96 miyon florin pa sosten social pa sigura pagonan di SVB y servicio di AZV. Banda di esaki Gobierno ta reserva 362 miyon florin pa sosten na economia den forma di FASE, Sosten Financiero pa Empresa Chikito y Mediano cada kwartaal (MKB) y Subsidio di Salario.

E crisis economico cu COVID19 ta hinca mundo y Aruba aden no a pasa ainda. Gobierno ta trahando pa brinda alivio y pa reactiva economia di nos Pais cu e fiansanan cu Aruba ta hayando di Hulanda. E mandatario di finansa y economia ta splica cu un gran parti di e placa cu Aruba ta fia di Hulanda ta bay pa sigura cu e fondonan SVB y AZV por keda funciona debidamente durante e situacion di crisis, y tambe pa sigura cu e economia di Aruba por wanta e crisis nunca antes bisto aki na nos Pais. Aruba su economia ta depende di turismo y tanten cu nan no yega bek Aruba, e situacion economico ta keda hopi debil mes. Pa aña 2021 ta premira un mehoracion den turismo, pero esaki no ta bay ta suficiente pa lora Aruba su economia manera custumber y pesey Gobierno ta percura pa den 2021 tambe sigui brinda e sosten necesario na economia di nos Pais den forma di FASE, Sosten Financiero di kwartaal y Subsidio di Salario.