Den 6 luna STA por pidi referendum na aeropuerto; Lista di trahado presenta pa STA a yega di participa den referendum caba

Despues cu a celebra un referendum solicita pa FTA na Triple A (Aeropuerto), tabatin un intento di parti di sindicato STA -cu ta presente pa basta aña caba den e mesun empresa- pa celebra otro referendum, pa asina sigui representa ampliamente e trahadonan den e compania aki.

Mediador di Gobierno, Anselmo Pontilius a declara na Bon Dia Aruba cu un referendum cu e caracteristica aki no ta posibel awor, sino cu mester warda un periodo di tempo. Pontilius a indica cu e departamento aki tin un maneho estableci y ratifica den corte pa hopi aña caba. E maneho estableci ta stipula cu si tin un referendum awe, solamente 6 luna despues por tin un proximo referendum pa e mesun grupo di trahado.

Oficina di Mediador di Gobierno a ricibi e carta di sindicato STA, y unabes cu nan a ricibi e carta a analisa su solicitud. Tambe nan a haya e lista di e departamentonan, ya cu STA a pidi e referendum pa algun departamento di Triple A. Pontilius a declara cu ley ta permiti cu bo por pidi referendum tambe pa departamento y no pa e totalidad, pasobra e referendum celebra recientemente y gana pa FTA tabata pa e totalidad di e empleadonan.

Sinembargo, nan por a conclui mesora cu e lista di trahadonan entrega pa STA pa departamentonan y cu a wordo analisa, den realidad ta e mesun lista di trahadonan cu a caba di participa den e referendum solicita pa FTA. Den e caso aki, e ley di referendum ta aplicabel solamente pa otro departamentonan cu no a participa den e referendum di luna pasa.

Consecuentemente nan a informa STA mediante un carta riba e maneho estableci y e periodo di 6 luna pa bin cu otro referendum pa e mesun grupo di trahadonan na servicio di aeropuerto of cu tabatin oportunidad pa participa den e referendum. Pontilius a bisa cu aki seis luna STA por pidi un referendum pa e mesun trahadonan.

Carta pa STA.
Departamento di Mediador di Gobierno a manda e carta pa pone STA na altura di e maneho estableci. Sinembargo, e sindicato menciona a laga sa su desacuerdo. No ta conoci si STA lo acudi na instancia huridico pa atende su solicitud pa celebra otro referendum na Triple A, prome cu seis luna.

Si un referendum lo tuma luga den aeropuerto prome cu e periodo aki, e mester ta pa otro departamentonan cu no a participa den e referendum di dia 27 di augustus ultimo, Mediador di Gobierno a reitera.

Encuanto dicon STA a abstene di participa den e referendum di dia 27 di augustus ultimo, Pontilius a bisa cu nan tabatin absoluto libertad di no participa of participa den e referendum. Pero nan a scoge pa no participa, cu ta parti di nan derecho tambe.

Mester tene cuenta cu te ainda STA ta representando trahadonan den aeropuerto. Ademas nan tin un contracto colectivo (CAO) vigente te fin di aña awor. Igualmente, gerencia di aeropuerto oficialmente como dunado di trabou no por nenga na e momento aki di sinta na mesa pa atende asuntonan diario di e trahadonan miembro di e sindicato STA.

E diferencia ta cu e ley di referendum ta bisa cu e dunado di trabou tin un obligacion pa sinta negosha e CAO cu e sindicato mayoritario. Den e referendum cu a tuma luga dia 27 augustus ultimo, FTA cu a gana e referendum, y nan a haya e mayoria.