Den 5 siman, Fundacion Pa Nos Comunidad a yuda 2.000 famia

Awe mainta Fundacion Pa Nos Comunidad (FPNC) a ofrece un conferencia di prensa pa duna di conoce su meta como fundacion, e cifranan di ayudo den temporada di covid-19 y asina mes e website na unda e persona y instancianan por registra.

Francis Saladin, presidente di FPNC a indica cu nan ta un instancia cu desde 2009 a posiciona su mes riba e di dos linea di ayudo structural pa locual ta trata pobresa.

Di mesun manera, el a splica cu e fundacion ta traha riba diferente aspecto di ayudo pa combati pobresa. E sistema di ayudo ta exigi profesionalismo, experticio, etica di trabou, proceso, maneho di criterio, procedura, responsabilisacion, pero tambe un evaluacion y monitor constante pa e desaroyonan na Aruba.

Asina mes, en su forma di traha FPNC ta garantisa su etica profesional, entre otro ayudo relaciona cu pobresa y cooperacion cu mas di 45 otro instancia cu ta brinda sosten pa e grupo vulnerabel den comunidad.

Saladin a señala cu e crisis aki di covid-19 a demostra cu respet pa trabou di otro ta esencial, pa hunto nan por logra yuda e comunidad cu cooperacion di amigonan di FPNC nan a logra saca mas di 2.000 pakete den luna di april pa yuda e comunidad, loke ta representa 2.000 famia cu a wordo yuda directamente.

Andrina Dirks secretario di e directiva a informa pa e medionan presente cu nan ta traha cu mas di 45 instancianan pa motibo cu e instancianan aki pa hopi biaha ta representa y ta fiha bienestar di un grupo di meta mas chikito, esunnan cu nan ta yama ‘sub-group’ den comunidad cu ta vulnerabel pa un motibo of otro.

Door cu e instancianan aki ta mas cerca di nan, nan por wak y midi otro necesidad cu tambe nan tin y asina boga cu e ayudo cu nan mester haya specifico cu ta banda di e pakete di cuminda, ademas ta hopi importante pa nan por baha e fluho cu tambe ta yega directamente cerca nan pa asina nan por controla y coordina miho e trabou.

Dirks a bisa cu pa via di palabracionnan cu a wordo haci cu instancianan den sector ta cu Departamento di Asunto Social (DAS) lo atende tur e cliente cu ta ricibi un of otro entrada di loke nan ta yama ‘finansa publico’. Por ehemplo, FASE, pension, entre otro, si e persona ta haya un di e ayudo ey pero e mes ta sinti cu mester di un ayudo extra door di e situacion e mester acudi na DAS y e ora ey lo referi pa haci e evaluacion pa wak di ki forma lo por wordo yuda y lo atende e clientenan ey.

“Den e situacion aki tin mas problema cu solamente e problema di cuminda”, e trahado social y instancianan oficial tin experticio pa por wak precies kico ta otro cosnan cu nan mester, Dirks a sigura.

Esunnan cu ta yega na FPNC ta clientenan cu no tin ni un entrada of cu a conoce un caida di entrada drastico, na e momento ey e persona por acudi cerca FPNC.

Esaki ta trata pa nan por controla e fluho, si por dirigi gruponan y reparti un tiki e trabou e ora ey ta bira mas facil pa nan por coordina y asina e ayudo por yega hopi mas lihe.

Dirks tambe a comenta cu den tempo aki di covid-19 a haya colaboracion di Skoa, cu tempo atras no tabata t’ey, na unda nan a yega na un areglo na unda Skoa por referi muchanan. Esey ta nifica otro tipo di ayudo cu ta bay por ehemplo, Fundacion Ban Uni Man Pa Cria Nos Muchanan cu tabata dirigi na scolnan y door cu scolnan ta cera e ayudo ey, tambe a cay afo.

Di locual ta trata cifranan, Dirks a expresa cu e impacto di e crisis aki tabata hopi grandi, no solamente riba e comunidad pero tambe riba tur instancia cu ta traha den e sector aki.

“Normalmente, nos tabata yuda rond di 250 famia pa luna, den henter aña di 2019 a yuda alrededor di 3.000 famia. Den e 5 siman di april, maart y cuminsamento di mei, e cifra aki a yega na 2.000 famia cu nos a yuda” Dirks a afirma.

Di loke ta trata e constelacion di famia, el a splica cu e reparticion di e total di esaki ta dividi prome den un 29%, cu ta representa e constelacion di famia di un persona; 24% constelacion di un famia di dos persona; 20% constelacion di famia di tres persona; 13% constelacion di famia di 4 persona y di 5 te cu 10 persona pa famia ta representa 14%. Den casonan aki nan a bira mas vulnerabel, pa motibo cu un of dos persona di esaki a perde nan trabou.

Di parti di districtonan, Oranjestad tin 31%, San Nicolas 20%, Noord y Tanki Leendert 13%, Santa Cruz 9% y Pos Chikito, Savaneta, Paradera, Dakota y tur e otronan den total ta bira 27%, loke ta demostra cu e districtonan mas grandi tin e ayudo y e peticionnan ta mas grandi tambe.

Asina mes, Dirks a bisa cu 62% di e famianan aki ya caba tabata wordo considera vulnerabel prome cu covid-19 y 38% di e famianan aki ta directamente afecta door di e crisis.

Di su parti, Gianaika van der Biezen, director di FPNC a trece dilanti cu e website di e fundacion ta disponibel pa henter comunidad por haya informacion tocante nan organisacion, tambe un tiki di nan proyectonan, empleadonan y tambe con un persona por bira boluntario y con por haci donacion.

Ta importante pa menciona cu pa prome biaha nan ta pone den disposicion pa clientenan, instancianan y amigonan di FPNC pa por registra online, esaki mirando e situacion cu ta afecta e comunidad, di mesun manera el a señala cu esaki lo bay ta disponibel di un manera temporario pa e personanan por aplica riba e website.