Siman pasa Comite Nacional di Famianan Victima di Desaparicion Forsa den e costanan di Venezuela, tabatin su prome actividad.

E lider di e comite aki, Johnny Romero a declara na Bon Dia Aruba cu alrededor di mas 152 persona a disparce durante aña 2019 so, entre lama cu ta separa e estadonan costero di Venezuela for di e islanan di Aruba, Bonaire y Corsou. Solamente abordo di tres boto: La Vela, Ana Maria y Jhon Eli Jose, 90 persona a disparce, entre nan Johnny su yiu di 27 aña.

Den nan agenda di actividad na Caracas, nan kier a hiba palabra dilanti Asamblea Nacional. Pero na final nan no a logra debi na cierto protocol. Sinembargo nan a papia cu e diputado Fredy Valero caminda nan a expone nan situacion y esun di tantisimo famia den nan mesun situacion.

Diahuebs nan a bati e porta di Ministerio Publico di Venezuela, pero prome cu e porta aki a habri, ya caba dilanti di nan a topa cu un muraya diki, invencibel y sin curason cu no a duna niun splicacion cla ni ayudo. Johnny Romero a denuncia cu den e mesun forma tambe otro organismonan di siguridad estatal a reacciona, incluyendo e tribunal di husticia na Venezuela. “Tur cos ta wordo neglisha y te aworaki niun contesta,” el a bisa.

E unico contesta cu nan a yega di scucha tabata, cu supuestamente nan ta buscando den e direccion robes. Nan a conseha mas bien pa nan busca mas den direccion di e partnernan di Reino Hulandes. Ya cu den e documentonan hudicial y tambe via e fiscalnan, e famianan aki ta haya como contesta cu e autoridadnan Venezolano a yega di pidi via canal diplomatico informacion riba e lista di Venezolanonan deteni y/of refugia, etc… pero cu nan no a haya niun sorto di contesta ainda for di Reino Hulandes. El a bisa cu e carta aki a wordo manda 8 luna pasa pa embahada di Hulanda, alomenos den e caso specifico di e boto La Vela di estado Falcon pero supuestamente niun reaccion a drenta.

Reunion Embahada di Reino Hulandes.
Pa tal motibo Johnny y su delegacion a sostene un reunion cu e representantenan diplomatico di Embahada di Reino Hulandes na Caracas, diahuebs atardi. El a declara cu nan a papia cu cuater persona di e sede diplomatico aki. Nan a informa nan cu niun di nan sernan keri cu a disparce no ta den islanan di reino Hulandes. Ademas nan bisa e comision cu tur informacion rekeri pa e autoridadnan Venezolano a wordo suministra debidamente.

El a declara na Bon Dia Aruba cu e intencion di e reunion aki tabata pa trece dilanti nan historia familiar y pidi nan ayudo. El a cualifica e reunion aki importante, ya cu nan no ta descarta cu eventualmente algun di nan ser keri ta den e islanan ABC (Aruba, Bonaire y Corsou).

Diasabra ultimo, Bon Dia Aruba a publica un entrevista tocante e drama humano cu e famianan aki ta sufriendo debi na e perdida misterioso di nan sernan keri. Johnny Romero ta tata di Johnny de Jesus Romero Palacios, un hoben di apenas 27 aña kende a dicidi di realisa un biahe sin regreso pa Corsou dia 7 di juni 2019. El a pidi simplemente pa nos autoridad competente por yuda nan aclaria e suerte final di nan sernan keri.