Gabinete Wever-Croes ta trahando pa por baha gastonan di personal. Pa e trabou por ta efectivo ta necesario pa tin un bista cla riba cual ta e factornan cu ta contribui na e gastonan di personal. Banda di overtime un factor cu ta hisando gasto di personal di Gobierno ta absentismo bou di e trahado publico.
Segun un comunicado di gobierno, den cuadro di esaki Minister Ruiz-Maduro a haya un presentacion di e director di Banco di Seguro Social, Edwin Jacobs, hunto cu Dr. Genser pa asina por haya un bista di e absentismo den sector publico y cuanto esaki ta contribui na e gastonan relaciona cu personal di Gobierno.
Den e presentacion, SVB a haci comparacion di varios indicador di absentismo den sector publico y sector priva y a analisa e porcentahe di absentismo di algun departamento grandi di Gobierno. Tambe a analisa cuanto e absentismo laboral ta costando sector publico y sector priva.
En comparacion den aña 2018, e empleado publico su absentismo (AO) a wordo notifica 5 biaha compara cu 1.3 biaha di e empleado priva. E AO di e empleado publico a dura 9 dia compara cu 5 dia den sector priva. Den sector publico, e absentismo tabata na 8.6% compara cu 2.9% den sector priva.
Pa aña 2018, Gobierno a gasta 62,8 miyon na gasto di absentismo bou di e trahado publico compara cu e 32,8 miyon cu sector priva a gasta na su personal. Mester remarca cu nos ta papia aki di un gasto promedio di 7,233 florin pa empleado publico, compara cu 1,470 florin di e empleado priva. E gastonan aki a wordo calcula a base di un poblacion promedio di 4,534 empleado publico (sin personal di educacion) versus 42,735 empleado priva registra na SVB.
Den e presentacion, tambe ehecutivonan di SVB a presenta posibel solucion pa baha e absentismo den sector publico. Dentro di poco, SVB lo brinda e presentacion aki na Conseho di Minister. Despues lo sigui reunionnan cu mas Departamento den diferente Ministerio pa asina hunto logra atende y yega na solucion factibel pa baha e gastonan di personal relaciona na absentismo di personal di Gobierno di Aruba, segun e comunicado ta finalisa.
