Democratanan den Congreso ta buscando sosten pa un voto pa autorisa formalmente e investigacion di impeachment, mientras otro oficial a testigua diamars den e investigacion di e esfuersonan di Presidente Donald Trump pa pone Ucrania investiga Joe Biden.
Nancy Pelosi lo a reuni den priva cu legisladonan democrata ayera, pa mira actitud tocante un posibel voto, segun personanan anonimo discutiendo e plan.
Trump, kende a yama e investigacion di impeachment un ‘proceso ilegitimo’ a presiona Pelosi pa tuma un votacion formal. Republicanonan kier test e democratanan politicamente vulnerabel cu un voto, cual por ta dificil den areanan unda Trump ta keda popular. Pero te awo Pelosi a resisti, bisando cu Congreso ta den su poder pa conduci investigacion di e brasa ehecutivo como parti di e sistema di ‘checks and balances’ di constitucion, y cu no mester un votacion.
E investigacion ta avansando rapidamente mientras un fila largo di oficialnan, principalmente di Departamento di Estado, ta presentando tras di porta cera e siman aki, algun di nan dunando detayenan vivido di e eventonan rond di e yamada dia 25 di juli entre Trump y Presidente Ucraniano, Volodymyr Zelenzkiy.
Segun auxiliar di Cas Blanco, Fiona Hill, consehero di siguridad nacional John Bolton tabata asina preocupa pa actividadnan di abogado personal di Trump, Rudy Giuliani, cu el a yam’e ‘un granada cu ta bay rementa tur hende’.
Giulani tabata involucra profundamente den e esfuerso pa presiona Ucrania pa e investigacion. Giuliani a reconoce cu el a ricibi pago na total di $500mil relaciona cu e trabou pa un compania opera pa Lev Parnas, kende hunto cu su socio Igor Fruman, a hunga un rol clave den esfuersonan di Giuliani pa lansa un investigacion Ucraniano pa corupcion contra Joe y Hunter Biden. E dos socionan a keda aresta siman pasa bou cargonan di financiamento di campaña.
Ta spera cu cinco oficial mas lo testigua e siman aki, principalmente for di Departamento di Estado, aunke no ta cla si nan tur lo presenta despues cu Trump a declara cu e no lo coopera cu e investigacion. Mientras cu e entrevistanan ta enfoca riba interaccion cu Ucrania, e investigacion por amplia proximo siman pa inclui entrevistanan cu oficialnan di presupuesto di Cas Blanco, kende por aclaria si ayudo militar a ser teni for di Ucrania mientras Trump y Giuliani tabata pusha pa investigacion.
Unabes democratanan completa nan investigacion, nan lo uza nan hallazgo pa determina si lo vota riba articulonan di impeachment.
