![APTOPIX Election 2024 Harris](https://www.bondia.com/wp-content/uploads/2024/07/Democratanan-cla-pa-nomina-Harris-virtualmente-dia-7-di-augustus_result-696x464.jpg)
(AP) — Delegadonan di Convencion Nacional Democrata (DNC) por haci vice-presidente Mericano, Kamala Harris nan nominado presidencial – y hasta cuminsa aproba su compañero di campaña, kende ainda no ta anuncia – den votacion online cuminsando proximo siman, mientras e partido ta busca pa uni rond un top nobo pa su campaña bayendo november.
Comite di regla di e convencion ayera a pasa un propuesta unda e delegadonan rond di e pais ta bay por vota riba potencial nominadonan presidencial pa reemplasa presidente Joe Biden, kende a bandona su campaña di reeleccion ultimo weekend.
Pero Harris ta e unico Democrata mayor pa anuncia publicamente cu e kier e nominacion, loke ta nifica cu casi sigur e lo ricibi aprobacion den un solo ronda di votacion virtual cuminsando dia 1 di augustus – como 18 dia prome cu apertura di e convencion na Chicago.
Presidente di Comite Nacional Democrata, Jaime Harrison a referencia e cambio sin precedente den e campaña presidencial resultado di retiro di Biden, bisando na un reunion virtual di e comite di regla di e convencion, “den e scuridad di anochi, nos ta mira nos streanan mas briyante.”
E plan a keda aproba despues di mas di 90 minuut di discusion online cu tiki obhecion. E voto final p pasa e set completo di regla di convencion tabata 157-3.
Nan ta rekeri Harris, y cualkier potencial Democrata dispuesto pa ret’e, pa entrega 300 firma electronico di delegadonan di convencion, no mas di 50 di cual por ta di e mesun estado, pa e anochi di 30 di juli.
Si varios candidato cualifica, por impulsa varios ronda di votacion durante varios dia. Pero si Harris ta e unico candidato, votacion lo cuminsa dia 1 di augustus. Delegadonan votando “no comprometi” of pa otro candidato cu no a cualifica bao di e reglanan, lo haya nan escogencia converti simplemente na “presente.”
Delegadonan ta bay ricibi nan papeleta via e-mail sigur. E proceso ta bay ta diseña pa no solamente nomina Harris formalmente, pero eventualmente haci mescos pa su seleccion vice-presidencial prome cu dia 7 di augustus – dunando e tiki tempo pa scoge un compañero di campaña.
Ken e por scoge no ta cla. Faboritonan inicial ta inclui gobernador di Kentucky, Andy Beshear, gobernador di Pennsylvania, Josh Shapiro, gobernador di North Carolina, Roy Cooper, Senador di Arizona, Mark Kelly, pero potencialmente otro 6 candidato ta siendo considera.